विदेशी सेनामा नेपाली नागरिक भर्ना हुन अनुमति दिने सरकारको नीति छैनः परराष्ट्र

परराष्ट्र मन्त्रालयले विदेशी सेनामा नेपाली नागरिक भर्ना हुन अनुमति दिने सरकारको कुनै नीति नरहेको जनाएको छ । मन्त्रालयले मंगलबार जारी गरेको विज्ञप्तिमा भनिएको छ, ‘विदेशी सेनामा नेपाली नागरिकहरू भर्ना सम्बन्धमा परम्परागत रूपमा सम्झौता अन्तरगत केही मित्रराष्ट्रहरूको राष्ट्रिय सेनामा नेपाली नागरिकहरू भर्ना हुदै आएकोमा बाहेक अन्य विदेशी सेनामा नेपाली नागरिक भर्ना हुन अनुमति दिने सम्बन्धी नेपाल सरकारको नीति नरहेको जानकारी गराइन्छ ।’
केही सामाजिक संजाल र सार्वजनिक संचार माध्यममा नेपाली नागरिकहरु विदेशी सेनामा भर्ना भएका भन्ने समाचारको सम्बन्धमा मन्त्रालयको ध्यानाकर्षण भएको पनि विज्ञप्तिमा उल्लेख छ । 

कसैको झुक्यानमा परी वा गलत सूचनाका आधारमा युद्धग्रस्त मुलुकहरूमा सुरक्षा सम्बन्धी काममा नजान मन्त्रालयले सबैमा अनुरोध गरेको छ ।