संयुक्त राष्ट्र संघ (यूएन)का महासचिव एन्टोनियो गुटेरेस गौतमबुद्धको जन्मभूमि लुम्बिनीबाट विश्व शान्तिका लागि आह्वान गरेका छन् ।

मंगलबार पोखराबाट लुम्बिनी पुगेका उनलाई प्रधानमन्त्री पुष्पकमल दाहाल ‘प्रचण्ड’ले स्वागत गरेका थिए । उनको स्वागतमा लुम्बिनीका पर्यटन व्यवसायी, स्थानीय आमा समूह र विभिन्न जातीय संस्कृति सहितका स्थानीयले स्वागत गरे । 

उनले लुम्बिनीको अवलोकनपछि पत्रकारमा बोल्दै शान्ति भूमिबाट शान्तिको सन्देशसहित सम्बोधन गरेका छन् । उनले संसारभर भइरहेका द्वन्द्व अन्त्यका लागि लुम्बिनीबाट आह्वान गरे । ‘संसारभर भइरहेका द्वन्द्व अन्त्यका लागि लुम्बिनीबाट आह्वान गर्छु,’ उनले भने । 

इजरायल, प्यालेस्टाइन, सुडानलगायत देशमा भएको द्वन्द्व अन्त्य गर्न उनले आह्वान गरे । बुद्ध जन्मस्थल लुम्बिनी आउन पाउँदा उनले खुसी व्यक्त गरे । 

जलवायु परिवर्तनप्रति उनले चिन्ता व्यक्त गरे । ‘शान्ति र मानवता अपरिहार्य विषय हो । मानवियता मर्न दिनुहुन्न,’ उनले भने,  ‘बुद्धका सन्देश, पञ्चशीलको सिद्धान्त र संयुक्त राष्ट्रसंघको मिसन मिल्दो जुल्दो छ । यो शान्तिको मुहानबाट सबैले सिकौँ, लुम्बिनी घुमौं ।’ 

महासचिवको लुम्बिनी भ्रमणले लुम्बिनी र गौतमबुद्धको शान्तिको सन्देश विश्वभर थप प्रचार–प्रसार हुने र लुम्बिनी क्षेत्रको पर्यटन प्रवर्द्धनमा मद्दत पुग्ने अपेक्षा गरिएको छ।