सरकारले विशेष अदालतको अध्यक्षमा उच्च अदालत दिपायलका न्यायाधीश टेकनारायण कुँवरलाई तोक्ने निर्णय गरेको छ । ​

बुधवार बसेको मन्त्रिपरिषद् बैठकले न्यायपरिषद्‌को सिफारिशमा कुँवरलाई विशेष अदालतको अध्यक्ष तोक्ने निर्णय गरेको हो । 

यसअघिका अध्यक्ष श्रीकान्त पौडेल उच्च अदालत जनकपुरको मुख्य न्यायाधीश बनेपछि कुँवरलाई अध्यक्ष बनाइएको हो । ​​

बुधबार बसेको मन्त्रिपरिषद् बैठकका निर्णय सार्वजनिक गर्न बिहीवार आयोजित पत्रकार सम्मेलनमा सरकारी प्रवक्ता रेखा शर्माले कानून मन्त्रालयको प्रस्तावमा विशेष अदालतमा अध्यक्ष र सदस्यहरू तोकिएको जानकारी गराएकी हुन् ।

विशेष अदालतको सदस्यमा तेजनारायण सिंह राई, रामबहादुर थापा र मुरारीबाबु श्रेष्ठ तोकिएका छन् । ​

बैठकले सैनिक विशेष अदालतमा उच्च अदालत पाटनका न्यायाधीश लेखनाथ पौडेललाई तोक्ने निर्णय समेत गरेको छ ।