नुवाकोटको बट्टारमा राति १० बजे एमालेको सभा

 नेकपा एमालेको ‘झुलाघाट–चिवाभञ्ज्याङ समृद्धिका लागि सङ्कल्प यात्रा’ अन्तरगत शनिबार राति नुवाकोटको बट्टारमा सभा गरिएको छ । राति १० बजे एमाले अध्यक्ष केपी शर्मा ओलीले सम्बोधन गरेका हुन् । 

चिसो मौसम र राति भएपनि जिल्लाका गाउँगाउँबाट आएका कार्यकर्ताहरुको बाक्लो संख्यामा उपस्थिति रहेको थियो । गोरखा हुँदै एमाले अध्यक्ष केपी शर्मा ओलीलगायतका नेताहरु बट्टार पुग्न ढिला भएका कारण ढिला गरी सभा आयोजना भएको एमाले नुवाकोटले जनाएको छ । आइतबार तय भएको कार्यक्रम प्रभावित हुन नदिन राति नै भएपनि सभा गरेको एमाले नुवाकोटका अध्यक्ष बद्री मैनालीले जानकारी दिए । 

नुवाकोट अघि शनिबार नै ओलीले गोरखाको आरुघाटमा आयोजित सभालाई सम्बोधन गरेका थिए ।   नुवाकोट मध्यपहाडी राजमार्गको मध्यविन्दु हो । एक हजार आठ ७९ किलोमिटर लामो राजमार्गको आधा भाग नुवाकोटबाट पूर्व र आधा भाग पश्चिमतर्फ पर्छ । 

यात्रामा पार्टी अध्यक्ष ओलीसहित वरिष्ठ उपाध्यक्ष ईश्वर पोखरेल, उपाध्यक्ष विष्णु पौडेल, महासचिव शङ्कर पोखरेल, उपमहासचिव पृथ्वीसुब्बा गुरुङलगायतका नेतालगायत छन् । 

एमालेको समृद्धिका लागि सङ्कल्प यात्राअन्तर्गत सुदूरपश्चिम, कर्णाली र लुम्बिनी प्रदेशको यात्रा गरिसकेको छ । मङ्सिर १४ गते मध्यपहाडी राजमार्गको पश्चिमी सुरुवाती विन्दु बैतडीको झुलाघाटबाट यात्रा सुरु भएको एमालेको यात्रा पूर्वी सीमाविन्दु पाँचथरको चिवाभञ्ज्याङमा पुगेर टुङ्गिने जनाइएको छ ।