पछिल्लो समय मुलुकमा धार्मिक साम्प्रदायिकताविरोधी आवाजहरू उठिरहेको बेला रुपन्देहीको तिलोत्तमामा भने धार्मिक सद्भावको सन्देश देखिएको छ ।

हिन्दू धर्मसँग सम्बन्धित श्रीमद् भागवत ज्ञान महायज्ञ एंव श्रृङारिक महाआरती कार्यक्रमको बिहीवार बौद्ध दर्शनका गुरु एंव लुम्बिनी विकास कोषका उपाध्यक्ष डा ल्हारक्याल लामा (खेन्पो छिमे)बाट उद्घाटन गराएर धार्मिक सद्भावको सन्देश दिइएको हो ।  

पण्डित दीनबन्धु पोखरेल प्रमुख कथावाचक रहेको महायज्ञमा बौद्ध दर्शनका बारेमा देशविदेशमा प्रवचन दिने लामा प्रमुख अतिथि बनेर धार्मिक सद्भाव र नेपालीहरू एकताबद्ध रहेको सन्देश दिएका हुन । कोटहीमाई मन्दिर प्राङ्गण तिलोत्तमा नगरपालिका वडा न. १७ पकडीहवामा आयोजित महायज्ञमा हिन्दू धर्मका अगुवाहरूको उपस्थिति थियो ।

महायज्ञको उद्घाटन गर्दै कोषका उपाध्यक्ष डा लामाले नेपाल धार्मिक सद्भाव र एकतामा लागि विश्वमै उदाहरणीय रहेको बताए । उनले सबैको सम्मानजनक उपस्थिति हुनुपर्ने बताउँदै नेपालीहरूबीचको एकतालाई साझा सम्पत्ति बनाउन सक्नुपर्ने बताए । 

उपाध्यक्ष लामाले लुम्बिनी र बुद्धलाई सबै नेपालीहरुले अपनत्व मान्नुपर्ने बताए । उनले बुद्ध जन्मस्थल लुम्बिनी शान्ति र पवित्रस्थल रहेकाले सबै धर्म र सम्प्रदायले अपनत्व गर्नुपर्ने उल्लेख गरे । उनले बुद्धजन्मस्थलको जिल्लामा भएको महायज्ञ आर्थिक संकलनसँगै समाजलाई जोड्ने काम गरेको पनि बताए । 

उक्त अवसरमा उपाध्यक्ष लामाले महायज्ञका लागि ५५ हजार ५५५ रुपैयाँ दिनेसमेत घोषणा गरेका छन् । कार्यक्रममा कथावाचक पोखरेलले नेपाली समाज सामाजिक रुपमा एकताबद्ध र धार्मिक रुपमासमेत मिलेर बसेको समाज रहेको बताए ।