‘लोकान्तर राउण्ड अप’ मा पाठकवृन्दलाई स्वागत छ । सधैँझैँ आज पनि हामी बितेको २४ घण्टाका मुख्यमुख्य घटनाक्रमसहित उपस्थित भएका छौँ–
आफूलाई लिटल बुद्ध दाबी गर्ने रामबहादुर बम्जनलाई केन्द्रीय अनुसन्धान ब्युरो (सीआईबी)ले  पक्राउ गरेको छ ।  सीआईबीको टोलीले उनलाई काठमाडौँको बुढानीलकण्ठबाट १८ दिनको रेकी पछि मंगलबार पक्राउ गरेको हो ।

 सीआईबीका अधिकारीहरूका अनुसार उनी पछिल्लो समयमा काठमाडौँमा आएको सूचना पाएको थियो । त्यसपछि सीआईबीका डीएसपी धर्म भण्डारीको नेतृत्वमा २५ जनाको टोलीले खोजी गरेर पक्राउ गरेको हो । 

उनलाई निकै मिहिनेतपछि   पक्राउ गर्न सफल भएको सीआईबी प्रवक्ता प्रहरी उपरीक्षक नवराज अधिकारीले बताए । बम्जनले आफूलाई काठमाडौँमा खोजिरहेको थाहा पाएका थिए । सोही कारण उनी लुकेर बसेको घरबाट बाहिर निस्किएका थिएनन् । प्रहरी सर्च अपरेसन गरेपछि बम्जन दुई तल्लाबाट हाम फाल्न खोजेको अनुसन्धानमा खटिएका एक अधिकारीले बताए ।
०००० 
कोशी प्रदेशको सभामुख चयनको विषयलाई लिएर राप्रपामा विवाद देखिएको छ। अध्यक्ष राजेन्द्र लिंदेन इतर पक्षले पार्टी निर्णयविपरीत कोशीमा पार्टीले सभामुख लिएको भन्दै विरोध गरेको हो । सोहीअनुसार निर्देशन समितिका अध्यक्ष प्रकाशचन्द्र लोहनीले उम्मेदवारी फिर्ता लिन निर्देशन दिएपनि अम्बर बहादुर विष्ट चयन भइछाडे उनले शपथ पनि लिइसकेका छन् । 

नवनिर्वाचित सभामुख अम्बरबहादुर विष्टले आफ्नै दल राष्ट्रिय प्रजातन्त्र पार्टीका केही नेताले असन्तुष्टि पोख्दैमा केही नहुने बताएका छन् ।
सभामुख पदमा निर्वाचित भएपछि विराटनगरमा मंगलवार सञ्चारकर्मीसँग कुरा गर्दै उनले यस्तो बताएका हुन् ।

‘केही मान्छेले पार्टीले निर्णय गरेको छैन भन्नुभयो, यसले केही फरक पर्दैन,’ उनले भने । सत्ता गठबन्धनको समर्थनमा आफ्नै दलका सांसद विष्टलाई सभामुख बनाउने तयारी भएपछि राप्रपाका वरिष्ठ नेता लोहनी पक्ष रुष्ट बनेको थियो । कोशीमा सभामुख लिने निर्णय केन्द्रमा नभएको लोहनीले बताएका थिए । 

गठबन्धनसँगै नेकपा एमालेले समेत समर्थन गरेपछि विष्ट निर्विरोध निर्वाचित भएका थिए । सभामुख विष्टले सबै दलका नेताहरूसँग समन्वय गरेर प्रदेशसभा नियमावलीअनुसार प्रदेशलाई अगाडि बढाउने बताए ।  
००००
सरकारले नेपाल प्रहरीका प्रहरी नायब महानिरीक्षक (डीआईजी)को सरुवा गरेको छ । गृह मन्त्रालयले मंगलवार १६ जना डीआईजीको सरुवा गरेको प्रहरी प्रधान कार्यालयले जनाएको छ ।
००००
राष्ट्रियसभा सदस्य निर्वाचनअन्तर्गत आज र भोलि दाबीविरोध र उजुरीउपर छानबिन हुनेछ । मनोनयन दर्ता गरेका उमेदवारविरुद्ध परेका दाबीविरोध र उजुरीमाथि आज र भोलि छानबिन गर्ने निर्वाचन आयोगको कार्यतालिका छ ।
००००
नेकपा एकीकृत समाजवादीका केन्द्रीय सदस्य तथ लुम्बिनी प्रदेश कमिटीका सचिव राजु गुरुङले पार्टी परित्याग गरेको आधिकारिक रुपमै घोषणा गरेका छन् ।

उनले सामाजिक सञ्जालमा पार्टी अध्यक्ष माधवकुमार नेपाललाई पत्र लेख्दै पार्टीको सदस्यता, केन्द्रीय कमिटी सदस्य र लुम्बिनी प्रदेश कमिटी सचिवको जिम्मेवारी निर्वाह गर्न असमर्थ भएको बताएका छन् ।
००००
नेपाल दूरसञ्चार प्राधिकरणका अध्यक्ष पुरुषोत्तम खनालले आफू बर्खास्तगीमा पर्न लागेको थाहा पाएर राजीनामा दिएको खुलेको छ ।
प्राधिकरण उच्च स्रोतका अनुसार सञ्चार तथा सूचना प्रविधि मन्त्री रेखा शर्माले सोमबार नै खनाललाई बर्खास्त गर्ने प्रस्ताव प्रधानमन्त्री तथा मन्त्रिपरिषद् कार्यालयमा र्पुयाएकी थिइन् । उनको राजीनामा मन्त्रिपरिषद्ले स्वीकृत गरिसकेको छ । 
००००
काठमाडौंको बिजुलीबजारस्थित चक्रवर्ती एजुकेसन एकेडेमीका सञ्चालक आफ्नै छोरासहितको समूहबाट कुटिएका छन् ।
कानून पढाई हुने निजी क्षेत्रको उक्तका कलेजका अध्यक्ष देवेन्द्र भण्डारी आफ्नै छोरा निरज भण्डारीसहितको समूहबाट कुटिएको काठमाडौं प्रहरी परिसरका प्रवक्ता एसपी कुमोद ढुंगेलले जानकारी दिए ।
००००
सरकारले उद्योगमा काटिएका लाइन तुरुन्त जोड्न विद्युत् प्राधिकरणलाई निर्देशन दिएको छ ।
मंगलवार सिंहदरबारमा बसेको मन्त्रिपरिषद्को बैठकले प्राधिकरणका प्रमुख कुलमान घिसिङलाई यस्तो निर्देशन दिएको हो । 

बैठकपछि सूचना तथा सञ्चार प्रविधिमन्त्री रेखा शर्माले हाललाई उद्योगीहरूका काटिएका विद्युत् लाइन खोल्न सरकारले निर्देशन दिएको जानकारी दिइन् ।
००००
कोरोनाभाइरसको नयाँ भेरियन्ट पुष्टि भएपछि नेपाल नागरिक उड्डयन प्राधिकरणले सबै विमानस्थल र एयरलाइन्समा स्वास्थ्य मापदण्ड पालना गर्न सर्कुलर गरेको छ । 

प्राधिकरणको मंगलबार बसेको बैठकले नेपालमा पनि कोरोना ओमिक्रोनको शव भेरियन्ट जे एन पुष्टि भएकाले स्वास्थ्य मापदण्ड पालनाका लागि आवश्यक निर्णय गरेको हो ।
००००
राष्ट्रियसभा सदस्य निर्वाचनमा समन्वय गर्न सत्ता गठबन्धनले समिति गठन गरेको छ । 

सत्ता गठबन्धनको मंगलबार बसेको बैठकले नेपाली कांग्रेसका नेता रमेश लेखक, नेकपा माओवादी केन्द्रबाट वर्षमान पुन, नेकपा एकीकृत समाजवादीबाट राजेन्द्र पाण्डे र जनता समाजवादी पार्टीका मनिष सुमन सम्मिलत समन्वय समिति गठन गरेको हो ।
००००
घरपालुवा कुकुर बिरालोलाई सार्वजनिक स्थानमा दिशा पिसाब गराउनेलाई महानगर प्रहरी बलले कारवाही गराउन थालेको छ ।

काठमाडौँ महानगरपालिका कुकुर बिरालो बन्ध्याकरण, भ्याक्सिनेसन तथा अभिलेख कार्यविधिबमोजिम जरिवाना तिराउन थालेको हो । काठमाडौँ महानगरपालिका क्षेत्रभित्र भएका कुकुर र बिरालाहरुको सुरक्षा र व्यवस्थापनका लागि कार्यविधि बनाइएको हो ।
००००
प्रधानमन्त्री पुष्पकमल दाहाल प्रचण्डले श्रम, रोजगार तथा सामाजिक सुरक्षा मन्त्रालयलाई ७५३ वटै स्थानीय तहबाट पुनः श्रमस्वीकृतिको व्यवस्था मिलाउन निर्देशन दिएका छन् ।

श्रममन्त्री शरदसिंह भण्डारीलगायतसँग मंगलवार मन्त्रालयमै भएको छलफलमा प्रधानमन्त्रीले वैदेशिक रोजगारीका स–साना कामका लागि पनि काठमाडौं धाउनुपर्ने परिस्थितिको अन्त्य गरी सम्भव सबै सेवा स्थानीय तहबाटै दिने व्यवस्था मिलाउन निर्देशन दिएका हुन् ।
००००
विश्वभरका हिन्दूहरूको आस्थाको केन्द्र काठमाडौंको पशुपतिनाथ मन्दिर परिसरमा स्तनपान कक्ष उद्घाटन गरिएको छ । 
मन्दिर क्षेत्रमा हुने महिलाको समस्यालाई मध्यनजर गर्दै पशुपति विकास कोषले आफ्नो नयाँ कार्यसमितिको पहिलो कामस्वरुप स्तनपान कक्ष स्थापना गरेको कोषकी अध्यक्ष लक्ष्मी पुनले जानकारी दिइन् ।
००००
नेपाल स्टक एक्सचेञ्ज  परिसूचक २० दशमलव ६२ अङ्कले वृद्धि भएको छ ।  नेप्से परिसूचक एक प्रतिशतले बढेर दुई हजार ८० दशमलव १२ अङ्कमा कायम भएको छ ।
तीन सय नौ कम्पनीको एक करोड ७९ लाख ४९ हजार पाँच सय ६२ कित्ता शेयर एक लाख चार हजार छ सय १९ पटक खरिदबिक्री हुँदा रु छ अर्ब ११ करोड ८३ लाख १७ हजार आठ सय ६६ बराबरको कारोबार भएको नेप्सेले जनाएको छ ।