नेपाली क्रिकेटको विकासमा सघाउन भारत तयार देखिएको छ । भारतका विदेशमन्त्री सुब्रमन्यम जयशंकर (एस जयशंकर) गत साता नेपाल आएका बेला नेपाली क्रिकेटलाई अगाडि बढाउन सहयोग गर्ने वाचा गरेका हुन् ।

नेपाल भ्रमणका क्रममा नेपाल क्रिकेट संघ (क्यान)का पदाधिकारी तथा राष्ट्रिय टीमका कप्तानसहित खेलाडीहरूसँगको भेटमा जयशंकरले सहयोगका लागि ठोस प्रस्ताव समेत मागेको खुलेको छ ।

द्वारिकाज् होटलमा बिहीबार साँझ सवा ६ देखि ७ बजेसम्म भएको भेटमा जयशंकरले के कस्तो सहयोग चाहिएको हो, त्यसबारे ठोस प्रस्ताव पठाउन आग्रह गरेको क्यानका उपाध्यक्ष रोशन सिंहले लोकान्तरसँग बताए ।

'उहाँले के कस्तो सहयोग चाहिएको हो, त्यस विषयमा ठोस प्रस्ताव पठाउनुहोस्, भारत सरकार र भारतीय क्रिकेट बोर्ड (बीसीसीआई) सहयोगका लागि तयार छ भन्नुभयो,' सिंहले लोकान्तरसँग भने ।

भेटवार्तामा क्यानका अध्यक्ष चतुरबहादुर चन्दले नेपाली क्रिकेटको विकासमा भारत सरकारका तर्फबाट सहयोगको अपेक्षा गरेका थिए ।

'नेपालको त्रिभुवन विश्वविद्यालयको मैदान सन् १९९९६ मा भारतकै जी टीभीले बनाएर हस्तान्तरण गरेको प्रसंग अध्यक्षज्यूले सुनाउनुभएको थियो,' सिंहले उक्त भेटवार्ताको प्रसंगमा थपे, 'फ्लड लाइट जडान गर्नेदेखि अन्य सहयोगका लागि समेत उहाँले आग्रह गर्नुभयो ।'

टीयू ग्राउन्डमा अन्तर्राष्ट्रिय स्तरको एकदिवसीय खेल र टी- २० अन्तर्राष्ट्रिय खेल समेत भइरहेको बारे चन्दले जानकारी गराएका थिए ।

भारतमा होम ग्राउन्डको प्रसंग

भेटका क्रममा नेपाली क्रिकेट टीमलाई भारतमा 'होम ग्राउन्ड' उपलब्ध गराउने विषयमा समेत कुराकानी भएको उपाध्यक्ष सिंहले खुलाए ।

भारतले अफगानिस्तानलाई 'होम ग्राउन्ड' उपलब्ध गराएर अहिलेको स्थितिसम्म ल्याएको प्रसंग उल्लेख गर्दै क्यानका सचिव पारस खड्काले नेपाललाई पनि त्यस किसिमको सहयोग गर्न प्रस्ताव राखेको सिंहले बताए ।

'सचिवज्यूले नेपाललाई पनि होम ग्राउन्ड उपलब्ध गराएर अन्तर्राष्ट्रिय प्रतियोगितामा सहभागी हुन दिन आग्रह गरेपछि विदेशमन्त्रीज्यू (जयशंकर)ले त्यसका लागि तयार रहेको बताउनुभयो,' उपाध्यक्ष सिंहले भने ।

टी-ट्यान्टी विश्वकपको तयारीका लागि समेत भारतमा ग्राउन्ड उपलब्ध गराउने विषयमा कुरा भएको सिंहले जानकारी थिए ।

'तत्काल टी-२० वर्ल्डकपको तयारीका लागि भारतको राजधानी दिल्लीसँगै टाँसिएको उत्तर प्रदेशको नोएडा क्रिकेट ग्राउन्ड उपलब्ध गराउन तयार छु । खेलाडीहरूलाई म आफैं मैदानमा स्वागत गर्न आउँछु भन्ने उहाँ (जयशंकर)को कुरा थियो,' सिंहले थपे ।

त्यसक्रममा जयशंकरले सचिव पारस खड्काको प्रशंसा समेत गरेका थिए ।

'तपाईं पहिले क्रिकेटर हुनुहुन्थ्यो । नेपाल क्रिकेट टीमको नेतृत्व गरेको मान्छे अहिले क्रिकेट बोर्डमै पदाधिकारी हुनुभएको रहेछ । यो धेरै राम्रो कुरा हो । नेपाली क्रिकेटको विकासका लागि तपाईंहरूसँग सहकार्य गर्न तयार छौं भनेर उहाँले भन्नुभयो,' सिंहले लोकान्तरसँग भने ।

जयशंकरसँग हिन्दी भाषामै कुराकानी भएको उनले खुलाए ।

'उहाँ (जयशंकर)ले आफैं पहल गरेर हाम्रो अध्यक्षज्यूसँग भेटको समय मिलाउनु भएको थियो,' सिंहले थपे, 'भारतको विदेशमन्त्रीको तहबाट यसरी पहल लिनु नेपाली क्रिकेटको विकासमा धेरै ठूलो कुरा हो ।'

त्यसक्रममा आफूले नेपाल-भारत सम्बन्धको चर्चा गर्दै सहयोगका लागि आग्रह गरेको सिंहले जानकारी दिए ।

भारतीय विदेशमन्त्रीसँगको भेटपछि क्यान अध्यक्ष चन्दले सचिव खड्कालाई प्रस्ताव तयार पार्ने जिम्मा दिएका छन् । आवश्यक सहयोग माग्ने विषयमा सचिव खड्काले प्रस्ताव तयार पारिरहेको सिंहले खुलाए ।

'सचिवज्यूले प्रस्ताव तयार गरिरहनुभएको छ । आगामी शुक्रवार भारतीय दूतावास र नेपालको परराष्ट्र मन्त्रालयमार्फत भारत सरकारलाई सहयोगको प्रस्ताव पठाउँछौं,' सिंहले लोकान्तरसँग भने ।

भेटमा क्यानका अध्यक्ष चन्द, उपाध्यक्ष सिंह, सचिव खड्का, कोषाध्यक्ष पदमबहादुर खड्का, नेपाली क्रिकेट टीमका कप्तान रोहित पौडेल तथा खेलाडीहरू सोमपाल कामी, दीपेन्द्रसिंह ऐरी, आशिफ शेख, अविनाश बोहोरालगायत सहभागी थिए ।