नेपाल वायु सेवा निगमले अन्तर्राष्ट्रिय उडान भर्ने न्यारोवडी र वाइडवडी विमान किन्नका लागि कर्मचारी संचय कोष र नागरिक लगानी कोषबाट लिएको ऋण स्वाप ( एउटा वित्तीय संस्थाबाट लिएको ऋण अर्को बैंकमा निश्चित शर्तहरु पालना गरेर सार्ने) गर्ने भएको छ । यसका लागि निगमले मंगलवार अन्तर्राष्ट्रिय आशयपत्र (ईओआई) आह्वान गरेको छ ।  

निगमका प्रवक्ता रमेश पौडेलले बुधवार एक विज्ञप्ति प्रकाशित गरी २०८० माघ ४ गते बसेको निगम संचालक समितिको निर्णय बमोजिम १३५ अर्ब सफ्ट लोन (सहुलियत पूर्ण ऋण) का लागि आशय पत्र आह्वान गरिएको जनाएका हुन् । 

कर्मचारी सञ्चय कोष र नागरिक लगानी कोषबाट लिएको ऋणको ब्याजदरभन्दा कममा सफ्ट लोन लिई ब्याज खर्चको भार कम गर्ने उद्देश्यले आशयपत्र आह्वान गरिएको निगमले बुधवार जारी गरेको विज्ञप्तिमा भनिएको छ ।

’लोन लिनका लागि सैद्धान्तिक सहमतिको लागि निगम, सञ्चालक, समितिका अध्यक्ष युवराज अधिकारीको अध्यक्षतामा जेठ २५ गते बसेको संचालक समितिको बैठकले नेपाल सरकारसमक्ष पेश गर्ने निर्णय भएबमोजिम संस्कृति पर्यटन तथा नागरिक उड्ययन मन्त्रालय, अर्थ मन्त्रालय र राष्ट्र बैंकसँग आवश्यक समन्वय गरी प्राप्त निर्देशनअनुसार माघ ४ को निगम सञ्चालक समितिको निर्णयबमोजिम १३५ अर्ब सफ्ट लोन प्राप्तिका लागि २३ जनवरी २०२४ मा अन्तर्राष्ट्रिय आशयपत्र आह्वान गरिएको छ,’ विज्ञप्तिमा उल्लेख छ । 

प्राप्त हुने सफ्ट लोनबाट सरकार तथा सम्बन्धित निकायहरूको स्वीकृति लिई मौजुदा लोन स्वाप गर्न निगमको १० वर्षे व्यावसायिक योजनाअनुसार आन्तरिक तथा अन्तर्राष्ट्रिय सेक्टरमा उडान भर्ने जहाजहरू खरिद गर्ने निगमको भनाइ छ । यस प्रयोजनमा अन्तर्राष्ट्रिय स्तरको जहाज मर्मत–सम्भार गर्ने ह्यांगर निर्माणका लागि लगानी गर्नेसमेत योजना निगमले सुनाएको छ ।

उक्त सफ्ट लोन एकैपटक नभई निगमको व्यावसायिक लगानीको आवश्यकताअनुसार पटक–पटक लिइने विज्ञप्तिमा जनाइएको छ ।

यसरी लोन प्राप्ति भएपश्चात् हाल निगमले वार्षिक रूपमा लिँदै आएको करिब साढे तीन अर्ब रुपैयाँ ब्याज खर्चमा उल्लेख्य कटौती हुन गई निगमको नाफा वृद्धि हुने अपेक्षाका साथ आशयपत्र आह्वान गरिएको निगमले जनाएको छ ।