भारतीय मोडल एवं अभिनेत्री पूनम पाण्डेको शुक्रवार अचानक निधनको खबर बाहिरियो । 

३२ वर्षीय यी अभिनेत्रीको निधनको खबरले धेरैलाई आश्चर्यमा पार्यो । पूनमको आधिकारिक इन्स्टाग्राम पेजबाट निधनको खबर सार्वजनिक भएको थियो । उनको आधिकारिक टोलीले पाठेघरको मुखको क्यान्सरका कारण पूनमको  निधन भएको घोषणा गरेको छ । यद्यपि, उनको मृत्यु पाठेघरको मुखको क्यान्सरका कारण नभइ औषधिको ओभरडोजका कारणले भएको समेत हुनसक्ने समेत भारतीय संचारमाध्यममा खबरहरू आइरहेका छन् । यद्यपि कुन प्रकारको औषधिमा प्रश्न उठेको हो भन्ने अझै पुष्टि नभएको बताइएको छ । 

१९९१ मा भारतको कानपुरमा जन्मिएकी पूनम सन् २०११ मा सम्पन्न विश्वकप क्रिकेटमा भारतले जिते टपलेस हुने भन्दै दिएको अभिव्यक्तिका कारण एकाएक चर्चामा आएकी थिइन् । उनले सन् २०१३ मा फिल्म ‘नशा’ बाट बलिउडमा डेब्यू गरेकी थिइन् । पछिल्लो पटक फिल्म ‘द जर्नी अफ कर्मा’मा उनी देखिएकी थिइन् । पूनम २०१८ मा पहिलोपटक नेपाल आएकी थिइन् । त्यसबेला रुसमा भएको विश्वकप फुटबलको फाइनल खेल नेपाली फ्यानहरुसँग बसेर हेर्न उनी काठमाडौं आएकी थिइन् । 

दरबारमार्गस्थित डेजाभु क्लबले उनलाई काठमाडौं ल्याएको थियो । 

रिपोर्टस क्लबमा आयोजित पत्रकार सम्मेलनमा बोल्दै पूनमले आफू नेपालमा पहिलोपटक आएको र असाध्यै सुन्दर देशको रुपमा नेपाललाई पाएको बताएकी थिइन् ।