नेपाल उद्योग वाणिज्य महासंघका अध्यक्ष चन्द्रप्रसाद ढकालले मुलुकमा लगानीको वातावरण निर्माण गर्न निजी क्षेत्रको तर्फबाट दिएका सुझावहरूअनुसार कानून संशोधन गर्न आवश्यक रहेको बताएका छन् ।​ ​

बुधवार इकोनोमिक मिडिया एशोसिएशन नेपालको प्रथम वार्षिकोत्सवको अवसरमा आयोजित अन्तरक्रिया कार्यक्रममा बोल्दै अध्यक्ष ढकालले यस्तो बताएका हुन् । लगानी सम्मेलन अगाडि नै जसरी भए पनि कानून संशोधन गरेर सरकारले लगानीको वातावरण बनाउनुपर्ने उनको भनाइ छ ।

'लगानी सम्मेलनको लागि निजी क्षेत्रतर्फबाट हामीले १२ वटा कानूनहरू संशोधन गरी लगानीको वातावरण बनाउन सरकारलाई सुझाव दिएका छौं । लगानी सम्मेलन अगाडि नै यी कानूनहरू संशोधन गर्न सकियो भने यसले वातावरण बनाउन सहयोग गर्नेछ र लगानी ल्याउन सहयोग गर्नेछ', उनले भने ।

उनले अर्थतन्त्रका धेरै सूचकहरू सकारात्मक हुँदाहुँदै पनि आम उपभोक्ता र लगानीकर्ता दुवैको मनोबल बढ्न नसकिरहेको अहिलेको अवस्थामा सरकारको तर्फबाट सकारात्मक सन्देशमात्र दिँदा पनि आम लगानीकर्ता र उपभोक्तामा केही कन्फिडेन्स आउने बताए ।

उनले बैंक तथा वित्तीय संस्थाबाट लिएको ऋण तिर्न पर्दैन भनेर केही व्यक्तिले दिएको अभिव्यक्तिले आम जनतामा अन्योल सिर्जना गरेको बताए ।

'निजी क्षेत्रको मनोबल गिरेको अवस्था छ । निजी क्षेत्रलाई हेर्ने दृष्टिकोण राम्रो हुन सकेको छैन । अहिलेको अवस्थामा लगानी बढ्न सम्भव छैन । यसका लागि लगानीको वातावरण बनाउन जरुरी छ', उनले भने, 'नकारात्मक कुराहरू निस्तेज गर्दै सरकारले लगानीको वातावरण निर्माण गर्न विशेष ध्यान दिन आवश्यक छ ।'

प्रक्रिया पूरा भएर पनि रोकिएका कम्पनीहरूको आईपीओ निष्कासन गर्न अनुमति दिन अध्यक्ष ढकालले आग्रह गरेका छन् ।

'आईपीओमा जाने प्रकृयामा रहेका कम्पनीहरूको आईपीओ रोकिएको छ । यो प्रकृयामा रहेका कम्पनीहरूको आईपीओ जारी गर्न खुल्ला गर्नुपर्छ', उनले भने, 'अहिले करिब २५/३० वटा कम्पनीहरू आईपीओमा लैजानका लागि प्रकृयाको अन्तिम चरणमा पुगेर रोकिएको अवस्था छ । यसलाई तत्काल अगाडि बढाउन आग्रह गर्दछु ।'