नेपालको वैकल्पिक क्रिकेट टीम नेपाल ए ले क्यानेडियन राष्ट्रिय टीमका खेलाडीहरू सम्मिलित 'क्यानडा एक्सआई'लाई २ विकेटले पराजित गरेको छ ।

मूलपानी मैदानमा भएको खेलमा २४१ रनको लक्ष्य नेपालले ४९ ओभर १ बलमा ८ विकेट गुमाएर पूरा गर्‍यो । अन्तिम ओभरमा नेपाललाई मात्र १ रन चाहिएको थियो ।

नेपालको जीतमा कप्तान सन्दीप जोराले सर्वाधिक ६६, बसिर अहमदले ५२, रसिद खानले ४७, अर्जुन कुमालले ४०, किरण ठगुन्नाले १३ र शेर मल्लले ७ रनको योगदान गरे ।​ बसिरको यो लगातार दोस्रो अर्धशतक हो ।

यसअघि श्रेयश मोभ्भाको ६८, नवनित धलिवालको ४६ र आरोन जोन्सनको ३६ रनको मद्दतमा क्यानडाले २४० रनको योगफल तयार पारेको थियो ।

नेपालका लागि साहब आलमले ३, शेर मल्ल र रसिद खानले समान २ तथा सागर ढकाल र बसिर अहमदले १-१ विकेट लिएका थिए ।

पहिलो खेल क्यानडाले अन्तिम ओभरमा ४ विकेटले जितेको थियो । यससँगै ३ खेलको शृंखलामा १-१ को बराबरी भएको छ ।

तेस्रो एवं निर्णायक खेल जित्ने टीमले शृंखला आफ्नो पक्षमा पार्नेछ ।