उदयपुर दुर्घटना अपडेटः मृत्यु हुनेको संख्या ८ पुग्यो

उदयपुरको बेलका नगरपालिका–७ मेनामैनीमा भएको बोलेरो दुर्घटना हुँदा मृत्यु हुनेको संख्या आठ पुगेको छ । एकजना घाइतेको धरानस्थित बीपी कोइराला स्वास्थ्य विज्ञान प्रतिष्ठान (घोपा क्याम्प)मा उपचारका क्रममा मृत्यु भएसँगै संख्या आठ पुगेको हो ।

हतुवागढी गाउँपालिका–५ का ४२ वर्षीय किसान राईको मृत्यु भएको जिल्ला प्रहरी कार्यालय उदयपुरका प्रमुख रमेश थापाले बताए ।

अन्य मृतकको पनि पहिचान खुलेको प्रहरीले जनाएको छ ।

मृत्यु हुनेमा बोलेरोमा सवार रहेका चालक हतुवागढी–२ का ४२ वर्षीय मानबहादुर बस्नेत, ७० वर्षीया पर्वतमाया राई, २३ वर्षीय चन्द्रप्रकाश राई र पर्वतमायाका ६ महिनाका नाति डिसाङ राई छन् । 

यस्तै हतुवागढी–९ का ६८ वर्षीय पदमबहादुर थापा, वडा नम्बर ५ की ३० वर्षीया रामकुमारी राई र सुनसरीको इटहरीका ४५ वर्षीय कमल अधिकारीको पनि घटनास्थलमा मृत्यु भएको छ ।

सुनसरीको धरानबाट भोजपुरको घोडेटारतर्फ जाँदै गरेको को१ज २५९३ नम्बरको बोलेरो बिहीवार बिहान ११ बजेको समयमा मैनामैनीमा सडकबाट अन्दाजी ४०० मिटर तल खसेको थियो । 

उक्त दुर्घटनामा परी मोरङको कानेपोखरी गाउँपालिका–५ का ३७ वर्षीय विशेष पराजुली, आमचोक गाउँपालिका–६ भोजपुरकी २० वर्षीया मिनु राई र सोही स्थानकी ३६ वर्षीया सावित्रा राई घाइते भएका छन् ।

यस्तै हतुवागढी–२ की ३२ वर्षीया शान्तिकला राई र हतुवागढी–१ का १७ वर्षीय सुनिल परियार, सोही स्थानकी १७ वर्षीया सविना परियार, इटहरी–१७ सुनसरीकी ३४ वर्षीया गायित्री कटवाल, उनकै ८ वर्षकी छोरी निकिता कटवाल र इटहरी–१७ की २९ वर्षीया रमा थापाको घोपा क्याम्पमा उपचार भइरहेको छ ।

मृत्यु भएका ६ महिने बालक डिसाङ घाइते भएकी शान्तिकलाका छोरा हुन् ।