अमेरिकाको ओहायो सिनेटका उम्मेद्वार बर्नी मोरेनोको प्रचार र्‍यालीमा पूर्व राष्ट्रपति डोनाल्ड ट्रम्पले २०२४ को राष्ट्रपति निर्वाचन आफूले नजिते 'रक्तपात' हुने धम्की दिएका छन् ।

उनले अमेरिकाबाहिर उत्पादन हुने विद्युतीय सवारी उद्योग र गैरकानूनी रूपमा अमेरिकामा रहेका आप्रवासीहरूबारे अपमानजनक शब्द प्रयोग गर्दै भाषण गरेका हुन् ।

'हामीले विदेशबाट आयात हुने प्रत्येक एक कारमा शतप्रतिशत कर लगाउँछौं,' उनले विदेशी उत्पादनको आलोचना गर्दै भने, 'यदि म निर्वाचित भएँ भने तपाईले ती कारहरू बेच्न सक्नुहुन्न ।'

उनले थपे, 'अब, यदि म निर्वाचित भइन भने रक्तपात हुनेछ ।'

ट्रम्पले आफू २०२४  मा पुन: चुनाव हारेमा देशभर हिंसा भड्किन सक्ने संकेत गर्दै अमेरिकी उद्योग तहसनहस हुने चेतावनी दिएका हुन् ।

'जो बाइडेनको पागलपनले विद्युतीय सवारीसाधन उत्पादन गर्ने अमेरिकी उद्योगलाई खतम पार्नेछ,' ट्रम्पको भनाइको समर्थन गर्दै उनका सल्लाहकार जेसन मिलरले सामाजिक सञ्जाल एक्स(ट्वीटर)मा लेखेका छन् ।

उनले ट्रम्पले यसअघि पनि राम्रो काम गरेकाले अहिले पनि राष्ट्रपतिका रूपमा ट्रम्पलाई निर्वाचित गर्नुपर्ने बताए ।

आगामी नोभेम्बर ५ मा हुन गइरहेको अमेरिकी राष्ट्रपतिको निर्वाचनले यतिबेला विश्वको ध्यान आफूतिर खिचिरहेको छ ।

चुनावमा हालका राष्ट्रपति बाइडेन र पूर्व राष्ट्रपति ट्रम्प भिड्ने पक्कापक्की जस्तै छ ।

राष्ट्रपति बाइडेनको चुनावी अभियानबारे ट्रम्पका समर्थकहरूले सामाजिक सञ्जालमा अराजक टिप्पणीहरू गर्न थालेका छन् । उक्त टिप्पणीमाथि प्रतिटिप्पणी गर्दै बाइडेन समर्थक पनि ट्रम्पप्रति आगो ओकलिरहेका छन् ।

'यो डोनाल्ड ट्रम्प को हो ?' बाइडेन अभियानका प्रवक्ता सिंगरले शनिबार राति एक बयानमा भने ।

'ट्रम्प अर्को जनवरी ६ चाहन्छन्, तर अमेरिकी जनताले यो नोभेम्बरमा उनलाई चुनावी पराजय दिनेछन् किनभने उनीहरूले उनको चरमपन्थ, हिंसाप्रतिको उनको मोह र बदलाको भावनालाई अस्वीकार गरिरहन्छन्,' उनले भने ।'