काठमाडौंको बूढानीलकण्ठ नगरपालिका २ भंगालबाट चोरीको मोटरसाइकलसहित एक किशोर पक्राउ परेका छन् ।

पक्राउ पर्नेमा काठमाडौंको चाबहिल बस्ने १८ वर्षीय सक्षम गुरुङ रहेका काठमाडौं उपत्यका ट्राफिक प्रहरी कार्यालयले जनाएको छ ।

प्रहरी कार्यालयका प्रवक्ता प्रहरी वरिष्ठ उपरीक्षक जीवनकुमार श्रेष्ठका अनुसार उनले वास्तविक नम्बर परिवर्तन गरेर मोटरसाइकल चलाउँदै आएका थिए । 

थप अनुसन्धान तथा कारबाहीका लागि प्रहरी वृत्त महाराजगञ्ज पठाइएको उनले जानकारी दिए । 

बागमती प्रदेश-०२-०२३ प ०४७२ नम्बरको बुलेट मोटरसाइकल काठमाडौंको टोखा इन्द्रेणी पुलबाट  हराएको भनि मोटरसाइकल धनी धादिङको गंगा जमुना गाउँपालिका ७ का प्रकाश श्रेष्ठले गत मंसिर २६ गते निवेदन दिएका थिए ।

त्यसपछि प्रहरीले खोजी शुरू गरेको थियो ।