कोशी प्रदेशका १३७ स्थानीय तहमध्ये ५६ वटा स्थानीय तहमा मात्र दमकल छन् । त्यसमध्ये ४९ वटा सञ्चालनमा छन् भने सातवटा बन्द छन् । कोशीका धेरै पालिकासँग दमकल नै छैनन् । १३७ स्थानीय तहमध्ये ८१ पालिका दमकलविहीन छन् । 

प्रदेश प्रहरी कार्यालयका अनुसार झापाका १५ पालिका मध्ये ७ वटामा मात्रै दमकल छन् । दमक नगरपालिकामा ३ वटा दमकल छन् भने भद्रपुरमा दुइटा रहेका छन् । मेचीनगर, गौरादह, बिर्तामोड र कमल गाउँपालिकामा एक–एक वटा वरुण यन्त्र रहेका छन् । 

यस्तै, इलामको सूर्याेदय, इलाम र देउमाई नगरपालिकासँग दमकल छन् । इलाम नपासँग दुई वटा दमकल रहेकोमा एउटामा सञ्चालनमा छैन ।  जिल्ला प्रहरी कार्यालय पाँचथरले २ वटा दमकल सञ्चालन गरिरहेको छ । ताप्लेजुङको सदरमुकाममा रहेको फुङलिङ नगरपालिकासँग भने एउटा दमकल छ । 

मोरङका ७ वटा पालिकासँग १० वटा दमकल रहेका छन् । १० वटामध्ये ३ वटा विराटनगर महानगरपालिकासँग रहेका छन् ।  सुनसरीका ६ पालिकासँग १० वटा दमकल रहेका छन् । सबैभन्दा बढी धरान उपमहानगरपालिकासँग ४ वटा दमकल छन् भने इनरुवामा भएका दुई वटा नै दमकल चल्दैनन् । 

तेह्रथुमको लालीगुराँस,  म्याङ्लुङ नगरपालिका र आठराई गाउँपालिकाले दमकलको व्यवस्थापन गरेका छन् । भोजपुर नगरपालिका वडा नम्बर ७ र भोजपुरकै हतुवा गढी गापा १ मा पनि दमकल रहेका छन् । उदयपुरका ४ पालिका सोलुखुम्बुको एक पालिका र खोटाङका दुई पालिका र ओखलढुङ्गाको सिद्धिचरण नगरपालिकासँग दमकल छन् ।

तर, भएका दमकलहरूसँग पनि दक्ष कामदार छैनन् । दमकलमा दक्ष जनशक्ति नभएका कारण आगलागी नियन्त्रणमा समस्या भएको प्रहरीको भनाइ छ । स्थानीयतहरूले बरुणयन्त्रका लागि भनेर जनशक्ति राखे पनि उनीहरूलाई तालिमको खाचो छ । ‘बरुणयन्त्रका लागि एकदम दक्ष जनशक्ति चाहिन्छ’, कोशी प्रदेश प्रहरी कार्यालयका एसपी दिपक पोख्रेलले भने, ‘आगलागी भएको स्थानमा कसरी काम गर्ने भन्ने राम्रो जानकारी भएकाले मात्रै चाडै नियन्त्रण गर्न सक्छन् ।’ स्थानीयहरूले राखेका कामदार केही दिन तालिम लिएका भरमा मात्रै चलिरहेको उनले बताए । स्थानीयतहरूले प्रहरीलाई बरुणयन्त्र दिएर ती कर्मचारी प्रहरीमार्फत् चल्ने बनाए आगलागी नियन्त्रणमा सहज हुने उनको भनाइ छ ।  

कोशी प्रदेशमा फागुनयता आगलागीको घटना अचाक्ली प्रहरीको तथ्याङ्कले देखाएको छ ।  आगलागीका कारण सयौँ मानिस घरबारविहीन बनेका छन् भने करोडौँको क्षति भएको छ । 

कोशी प्रदेश प्रहरी कार्यालयले दिएको तथ्याङ्कअनुसार चालु आर्थिक वर्षको फागुन र चैत्र महिनाको ७ गते सम्म आगलागीमा परेर १३ जनाको मृत्यु भएको छ । फागुनमा १० जनाको र चैत्रमा ३ जनाको आगलागीका कारण मृत्यु भएको प्रहरीको तथ्याङ्कमा उल्लेख छ ।  

चैत्र ७ गते सम्ममा १०१ जना घाइते भएका छन् । चैत्रमा मात्रै १७५ चौपायाको मृत्यु भएको छ भने फागुनमा ५ हजार ६४७ चौपायाको मृत्यु भएको थियो । १ महिना ७ दिनमा ५१० वटा घरमा क्षति भएको कोशी प्रदेश प्रहरी कार्यालयले जनाएको छ । ७० करोड ९९ लाख १६ सय रुपैयाँ बराबरको क्षति भएको एसपी पोख्रेलले बताए । उनका अनुसार तीन आर्थिक वर्षभन्दा बढी धनजनको क्षति भने चालु आवको चैत्र ७ गतेसम्म भएको प्रहरीको तथ्याङ्क रहेको छ । 

आर्थिक वर्ष २०७८/०७९मा १५ जनाको मृत्यु भएको थियो भने आव २०७९/८० मा  पनि १५ जनाको ज्यान गएको थियो  । आर्थिक वर्ष ०७८/०७९ मा ७७ करोड ५९ लाख ३ हजार ४९६ रुपैयाँको क्षति भएको प्रहरीको तथ्यांकमा रहेको छ भने आर्थिक वर्ष २०७९/०८ मा भने १ अर्ब १३ करोड ८१ लाख ८८ हजार ७७४ रुपैयाँ क्षति प्रदेश प्रहरीको तथ्यांक छ ।