इंग्लिस प्रिमियर लिग फूटबलमा बराबरी खेल्दै म्यानचेस्टर युनाइटेड र ब्रेन्टफोर्डले एक–एक अंक बाँडेका छन् । शनिवार राति भएको खेलमा दुवै टोलीले अतिरिक्त समयमा एक–एक गोल गर्दै अंक बाँडेका हुन् ।

गोलरहित बराबरीतर्फ उन्मुख खेलमा म्यानचेस्टर युनाइटेडले अतिरिक्त समयको छैटौं मिनेटमा अग्रता लिएको थियो । युनाइटेडमा मेसन माउन्टले गोल गर्दै अग्रता दिलाएका थिए । उनले कासमिरोको पासमा गोल गरेका थिए ।

एक गोलले पछि परेको तीन मिनेटपछि नै ब्रेन्टफोर्डले पनि बराबरी गर्न सफल भयो । क्रिस्टोफोर अजेरले इभान टोनीको पासमा गोल गर्दै अन्ततः खेल एक–एकको बराबरीमा टुंग्याउन योगदान गरे । बराबरीपछि दुवै टोलीले तालिकामा एक–एक अंक थपेका छन् । युनाइटेड ४८ अंकका साथ तालिकाको छैटौं स्थानमा रहेको छ भने ब्रेन्टफोर्ड २७ अंकका साथ तालिकाको १५ औं स्थानमा छ ।

प्रिमियर लिगकै अर्को खेलमा एस्टन भिल्ला विजयी भएको छ । एस्टनले उल्भ्सलाई २–० गोल अन्तरले पराजित गरेको हो । एस्टनको जीतमा मौसा डीबेको ३६ औं र एजिर नोगोयोको ६५ औं मिनेटमा गरेको गोल निर्णायक रह्यो । जीतपछि एस्टन ५९ अंकका साथ तालिकाको चौँथो स्थानमा उक्लिएको छ । 

त्यसैगरी टोटनहम हटस्परले लुटन टाउनलाई २–१ गोल अन्तरले पराजित गर्दा सेफिल्ड युनाइटेड र फुलह्यामले तीन–तीन गोलको बराबरी खेलेका छन् । नटिङघम फरेस्ट र क्रिस्टल प्यालेसले एक–एक गोलको बराबरी खेल्दा चेल्सी र बर्नलीले दुई–दुई गोलको बराबरी खेल्दै अंक बाँडे । 

यसैगरी बर्नमाउथले एभर्टनलाई २–१ गोल अन्तरले पराजित गर्दा न्यक्यासल युनाइटेडले वेस्टह्याम युनाइटेडलाई ४–३ गोल अन्तरले स्तब्ध बनायो ।

प्रिमियर लिगमा २९ औं चरणको खेल जारी रहँदा आर्सनल ६४ अंकका साथ तालिकाको शीर्ष स्थनमा रहेको छ । समान ६४ अंक रहेको लिभरपुल दोस्रो स्थानमा रहँदा एक अंक कम भएको म्यानचेस्टर सिटी तेस्रो स्थानमा रहेको छ ।