नेपाल वायु सेवा निगमले ग्राउण्डेड जहाज ९एन-एकेएक्सको मर्मत सम्भारगरी चाँडै उडान शुरू गर्ने भएको छ । १५ अप्रिलसम्म बिग्रिएको इन्जिन तयार गरी ग्राउण्डेड जहाज २२ अप्रिलभित्र उडानमा ल्याउने निगमको तयारी छ । विमान सञ्चालनमा आएपछि एउटा भाडाको इन्जिन विमानमा नै रहने र उडानसमेत नियमित हुने निगमको भनाइ छ । 

निगमको जहाज ९एन-एकेएक्समा जडित पहिलो इन्जिनको नियमित मर्मत सम्भारको क्रममा बिग्रिएपछि इजरायलस्थित इजरायल एरोस्पेस इन्ड्रस्ट्री (आईएआई)लाई मर्मतको जिम्मा दिइएको थियो । 

आईएआईसँगको सम्झौता अनुरूप इन्जिनलाई मर्मत गर्ने र लिज इन्जिन जडान गरी उडान सुचारु गर्ने उद्देश्यले १७ सेप्टेम्बर २०२३ मा इजरायल पठाइएको थियो । उक्त इन्जिन जडान गरी २८ सेप्टेम्बर २०२३ मा उडान सुचारु गरिएको थियो ।

नियमित उडानमा रहेको ९एन-एकेएक्स जहाजको इन्जिनको नियमित प्राविधिक परीक्षण २७ नोभेम्बर २०२३ मा गर्दा उक्त इन्जिनसमेत बिग्रिएको पाइएकोले ३० नोभेम्बर २०२३ देखि जहाज ग्राउण्डेड गरिएको निगमले जनाएको छ । सम्झौताअनुसार आईएआईसँग पटकपटक भाडामा इन्जिन लिन पत्राचार गर्दा दोस्रो इन्जिन भाडामा दिन खोजिरहेको र आईएआईले जनवरी अन्तिम वा फेब्रुअरी पहिलो हप्तासम्म दिनसक्ने जनाएको थियो ।

दोसो इन्जिन छिटो मर्मत गर्ने साथै पहिलो भाडाको इन्जिनको भाडा रकम जहाज आईएआईसँग फ्यासिलिटीमा रहदासम्म तिनु नपर्ने गरी उक्त जहाज इजरायलस्थित आईएआईको फ्यासिलिटीमा ११ जनवरी २०२४ मा लगिएको र जहाज फर्काइ उडान सुचारु गर्ने गरी आईएआईलाई निगमले बारम्बार ताकेता गरिरहेको निगमले जनाएको छ ।

आईएआईलाई यथासक्य छिटो एचपीसी ब्लेड्सहरू ल्याउन, इन्जिन मर्मत कार्य छिटो सम्पन्न गर्न र भाडाको इन्जिन तत्काल उपलब्ध गराउन निगमका कार्यकारी अध्यक्ष युवराज अधिकारीसहित सम्बन्धित सीएएम विभागका साथै बेला-बेलामा आईएआई पठाइएका अनसाइट प्राविधिक टोलीहरूले बारम्बार ताकेता गरिरहेको पनि निगमले जनाएको छ ।

कार्यकारी अध्यक्षको समन्वयमा इजरायलस्थित नेपाली राजदूत कान्ता रिजाललाई पनि यस विषयमा अवगत गराईएको निगम स्रोतले बताएको छ। दूतावासबाट समेत यथाशक्य छिटो निगमको जहाज नेपाल फर्काउन पहल गर्न अनुरोध गरिएको र दूतावासले इजरायलको परराष्ट्र मन्त्रालयलाई पत्र लेखी आवश्यक पहल गरिरहेको निगमले जनाएको छ ।

यस्तै, जहाज ए ३२० मा जडित भी२५२७ ई-ए५ इन्जिन मर्मत सम्भारको लागि सार्वजनिक खरिद ऐन तथा निगमको आर्थिक विनियमावलीअनुसार नियमसंगत तरिकाले काम गरिएको निगमले जनाएको छ । नेपाल नागरिक उड्डयन प्राधिकरणबाट मान्यता प्राप्त योग्य कम्पनीहरूसँग खुला प्रतिस्पर्धाबाट टेन्डर आह्वान गरी इजरायलस्थित आईएआईलाई छनोट गरिएको निगमले जनाएको हो । आईएआईसँग ३१ अगस्ट २०२३ मा इन्जिन मर्मत गर्न चार वर्षका लागि लिज सहितको मर्मत सम्भारसम्बन्धी कार्य गर्न सम्झौता भएको थियो ।