नेपाली कांग्रेसका नेता चन्द्र भण्डारीले देश परिवर्तन गर्न हिँडेका नेताहरूले आफ्ना सन्तानलाई सुन बोकाउन सिकाएको टिप्पणी गरेका छन् । शनिबार होटल तथा रेष्टुरेन्ट व्यवसायी संघ रूपन्देहीको साधारणसभामा बोल्दै सांसद भण्डारीले नेताहरूले सत्तामा पुगेर आफ्ना छोराहरूलाई सुन्न तस्करी गर्न सिकाएको टिप्पणी गरे । नेताहरूले जनताको काम नगरेको उनले बताए । 

नेता भण्डारीले १२ जना नेताकै कारण देशको आर्थिक अवस्था तहसनहस बनेको दाबी गरे । ‘यस्ता नेताहरूबाट देश बन्छ भनेर कहिलेसम्म कुरिरहने ?,’ भण्डारीले भने, ‘३४ वर्षदेखि एउटै अनुहारलाई भोट हालेर जिताइरेका नेपाली जनताहरूले अब विवेकपूर्ण निर्णय गर्नुपर्छ । जसले घुस खाँदैन उसलाई छान्नुस् त मुलुक दुई दिनमा बन्छ । नेताको दास बनेर देश बन्छ भन्नु कल्पना मात्र हुनेछ ।’
 
अदूरदर्शी नेतृत्वका कारण भैरहवाको गौतमबुद्ध अन्तर्राष्ट्रिय विमानस्थल र पोखरा विमानस्थल अलपत्र परेको उनले बताए । ‘नचलाउने भए यतिका धेरै खर्च गरेर किन एयरपोर्ट बनाउनू,’ भण्डारीले भने, ‘एयरपोर्टका ठाउँमा सुनवलदेखि पोखरासम्म पाँच लेनको सडक बनाएको भए करोडौं भारतीय पर्यटकलाई भित्र्याउन सकिन्थ्यो । यो क्षेत्र आर्थिक रूपमा धेरै माथि जान्थ्यो । तर, कमिसनको लोभमा विकेका नेताले जनतालाई घात गरे ।’