अब संसद्‌मा कांग्रेसलाई बोल्न दिइँदैन, पहिले रविले बोल्न पाउनु पर्छ– ओली

नेकपा (एमाले)का अध्यक्ष केपी शर्मा ओलीले संसद्मा नेपाली कांग्रेसले बकबास गरिरहने र आफूहरू सुनेर बस्ने अवस्था अब नरहेको बताएका छन् । उनले कांग्रेसले भन्दा पहिला उपप्रधान तथा गृहमन्त्री रवि लामिछानेलाई बोल्न दिनुपर्ने बताए । 

संसदीय दलको बैठकलाई बुधवार सम्बोधन गर्दै ओलीले बिहीवारदेखि संसद्मा आफूहरू पनि बोल्न खोज्ने बताएका हुन् । ‘कांग्रेसले पाखुरा देखाएको भरमा, हामी लत्रिदिनु पर्ने ? आरोपित गरेको व्यक्ति बोल्न पाउनु पर्छ । अर्को दिनबाट हामी पनि बोल्न खोज्छौं, कांग्रेसलाई बोल्न दिइँदैन,’ उनले भने, ‘पहिले रविले बोल्न पाउनु पर्छ, नभए हामी बोल्छौं ।’

पूर्वप्रधानमन्त्रीसमेत रहेका ओलीले बिहीवारदेखि संसद् सुचारु गर्नुपर्ने बताए । ‘कांग्रेसले संसद्मा गरिरहेको व्यवहार न डेमोक्रेसी, न संसदीय अभ्यास । हामी मर्यादित संसदीय अभ्यासका लागि संघर्ष गर्छौं ।’

आफूहरूले सुन तस्करीमा गोलमाल भएका कारण त्यो बेला संसदीय छानबिन समिति र आयोगको कुरा गरेपनि अहिले सहकारी ठगीमा त्यस्तो आवश्यकता नभएको ओलीले बताए । 

‘त्यो ठीक थियो, अहिले कसले सुन लुकायो कि ? कुनै अड्दा-अदालत कतै–कसैको केही जाहेरी पर्यो र संसदीय छानबिन समिति ?’, उनले प्रश्न गरे ।