आगलागीबाट ध्वस्त बनेको डेल्टा एजुकेसन असार तेस्रो सातादेखि पुनः सञ्चालनमा आउने

आगलागीबाट पूर्ण रूपमा ध्वस्त बनेको बुटवलको डेल्टा एजुकेसन मार्ट यही असार तेस्रो सातादेखि पुनः सञ्चालनमा आउने भएको छ ।​​

मार्टका सञ्चालकले सोमबार बुटवलमा पत्रकार सम्मेलन गरेर पहिलो चरणमा असार १६ गतेदेखि सञ्चालनमा आउने जानकारी दिइएका हुन् ।

विद्युत् सर्ट भएर गएको शुक्रबार साँझ ६ बजेदेखि मार्टमा आगलागी भएको थियो । १३ वटा वारुण यन्त्रको सहयोगमा करिब ८ घण्टापछि उक्त आगो नियन्त्रणमा आएको थियो ।​

​मार्टका अध्यक्ष लोकनाथ उपाध्यायले आगलागीबाट ४५ करोड रूपैयाँको नोक्सान भएको बताए ।

‘हामी पहिलो चरणमा यही १६ गतेदेखि एजुकेसन सञ्चालन गछौं,’ उपाध्यायले भने, ‘विस्तारै दशैसम्म, जुत्ताघर, लुगाघर र रेस्टुरेन्ट सञ्चालनमा आउँछन् ।’​​​

मार्टका सञ्चालक चोलाप्रसाद पाठकले ग्राहक र विद्यार्थीप्रति  मार्टले गरेको प्रतिबद्धतालाई डगमगाउन नदिने गरी मार्ट उठ्ने बताए ।

समयमा दमकल आएको भए मार्टका धेरै समान जोगाउन सकिने देखिएको उनको भनाइ थियो ।