काठमाडौँ, १७ कात्तिक - नेकपा (एमाले) का महासचिव ईश्वर पोखरेलले मुलुकमा सरकारको स्थायित्व, दिगो शान्ति र विकासका लागि वाम गठबन्धनलाई मतदान गर्न जनतालाई आग्रह गरेका छन् ।

नेकपा (एमाले) क्षेत्र नं ५ प्रदेश (ख) को आयोजनामा भएको कार्यक्रममा महासचिव पोखरेलले देशमा आर्थिक गतिविधि गरी जनताको समृद्धिको चाहनालाई पूरा गर्न आगामी मंसिरमा हुने दुवै चुनावमा वाम गठबन्धनको साझा उम्मेदवारलाई जिताउनुपर्नेमा जोड दिए ।

उनले वाम गठबन्धनको औचित्य पुष्टि हुनेगरी चुनावी अभियानमा लाग्न नेता तथा कार्यकर्तालाई निर्देशन दिए । उनी त्यस क्षेत्रबाट प्रतिनिधिसभाको उम्मेदवारसमेत छन् ।

कार्यक्रममा पार्टीका पर्यटन विभाग प्रमुख सूर्य थापाले वामपन्थीको गठबन्धनलाई चौतर्फी घेराबन्दी गर्ने काम भइरहेको बताउँदै राष्ट्रको अखण्डता र जनताको स्वाभिमानलाई कायम राख्नेमा पार्टीले कसैसँग पनि सम्झौता नगर्ने प्रष्ट पारे ।
प्रदेश (ख) का उम्मेदवार दीपक निरौला, प्रदेश (ख) का संयोजक शान्ति अधिकारी, सहसंयोजक मनिराज डंगोललगायतले एमालेले देश र जनताको पक्षमा लिएका नीति र कार्यक्रम वैज्ञानिक रहेको बताउँदै यसलाई कार्यान्वयन गर्न जनताले वाम गठबन्धनलाई जिताउने विश्वास व्यक्त गरे ।

---

---