होलीको रंग आँखामा परे गुम्नसक्छ दृष्टि, बच्न यस्ता छन् डा. सैंजुका सुझाव

काठमाडौं, १७ फागुन- आज होली पर्व । तपाईं बिहानैदेखि रंग र लोला लिएर साथीभाइसँग रमाउँदै हुनुहुन्छ होला । होलीमा विशेषगरी रंग एकआपसमा दलेर रमाइलो गरिन्छ ।

होलीमा जथाभावी रंग खेल्दा आँखामा पर्ने सम्भावना हुन्छ । त्यसैले होली खेल्दा आँखाको सुरक्षामा विषेश ध्यान दिनुपर्ने तिलगंगा आँखा अस्पतालका नेत्र विशेषज्ञ डा. रोहित सैंजुले बताए ।

उनले लोकान्तरसँग भने, ‘होलीमा प्रयोग हुने रंगहरू प्राकृतिक छैनन् । यसमा विभिन्न किसिमका केमिकलहरु मिसाइएका छन् । जसले  आँखामा एलर्जीदेखि दृष्टि गुम्ने खतरासमेत हुनसक्छ ।’

डा. सैंजुका अनुसार आँखामा रंग पर्दा यस्तो असर गर्छ-

आँखा बिझाउने समस्या हुन्छ ।
आँखा पोल्छ ।
आँसु बगिरहन सक्छ ।
आँखा हेर्न गाह्रो हुन्छ ।
आँखाको पानी धमिलो हुन्छ ।
रंगको असरले दृष्टि गुम्नेसमेत खतरा हुन्छ ।

आँखामा रंगको असर पर्ने डरले होली खेल्नै नहुने भने होइन । आँखालाई सुरक्षा दिएर होलीमा रमाउन सकिने डा. सैंजुको भनाइ छ । ‘आँखालाई असर गर्छ भनेर होली नै नखेल्नु भनेको होइन । आँखालाई सुरक्षा हुनेगरी सजग भएर होली खेल्न सकिन्छ ।

त्यसका लागि आँखामा चम्मा लगाउँदा पनि होलीको रंग तथा लोला आँखामा पर्ने सम्भावना हुँदैन,’ उनले भने, ‘आँखा जोगाएर होली खेल्दा पनि झुक्किएर आँखामा रंग पर्न सक्छ । यस्तो अवस्थामा आँखाको हेरचाहमा विशेष ध्यान दिनुपर्छ ।

आँखामा रंग परिहाले के गर्ने के नगर्ने ?

आँखामा रंग परेमा तुरुन्तै सफा पानीले पखाल्नुुपर्छ । 
आँखा मिच्नु हुँदैन ।
सफा पानीले आँखालाई ५ देखि १० मिनेटसम्म निरन्तर पखाल्नुपर्छ ।
१० मिनेटसम्म आँखा पखाल्दा पनि बिझाएमा नजिकैको स्वास्थ्य संस्था वा आँखा केन्द्रमा उपचार गराउन जानुपर्छ ।