कार्यादेश टुङ्गो लगाउनअघि प्रचण्ड र देउवाबीच छलफल

सहकारी ठगी प्रकरण छानबिनका लागि गठन गरिने संसदीय छानबिन समितिको कार्यादेश (टीओआर) टुङ्गो लगाउनअघि प्रधानमन्त्री पुष्पकमल दाहाल प्रचण्ड र नेपाली कांग्रेसका सभापति शेरबहादुर देउवाबीच छलफल भएको छ ।

बूढानीलकण्ठस्थित देउवा निवासमा आज बिहान छलफल भएको कांग्रेस स्रोतले जनाएको छ ।

प्रमुख राजनीतिक दलका शीर्ष नेताहरूबीच आज बैठक बस्दैछ । शनिबारको बैठकमा टीओआरका विषयमा टुङ्गो लाग्न नसकेपछि बैठक आज पनि बस्ने तय भएको हो । यसअघि प्रधानमन्त्री प्रचण्ड र कांग्रेस सभापति देउवाले छलफल गरेका हुन् । 

शनिबार दिउँसो कार्यदलको बैठकपछि प्रधानमन्त्री निवास बालुवाटारमा कार्यदलका सबै सदस्यसहित शीर्ष नेताबीच छलफल भएको थियो । बैठकमा प्रधानमन्त्री पुष्पकमल दाहाल प्रचण्ड, नेकपा (एमाले)का अध्यक्ष केपी शर्मा ओली, नेपाली कांग्रेसका उपसभापति पूर्णबहादुर खड्कालगायत सहभागी थिए । 

आजको बैठकमा कांग्रेसका सभापति देउवा पनि सहभागी हुनेछन् । टीओआरबारे सहमति जुटे आजै संसद्बाट सरकारको नीति तथा कार्यक्रम पारित हुनेछ ।