पोखरा- पोखरामा विगत दुई दशकदेखि सञ्चालन हुँदै आएको टप्स बोर्डिङ स्कूललाई जथाभावी फोहर फालेको आरोपमा जरिवाना तिराइएको छ । शनिवार बेलुका स्कूलले ट्रिपरमा फोहोर लगेर कालीखोलामा फालेको आरोपमा स्कूललाई ५० हजार जरिवाना गराइएको छ ।

पोखरा १० रामघाटमा रहेको टप्स स्कूलले ट्रिपरमा हालेर फोहोर फालेको स्थानीयले देखेपछि जनप्रतिनिधि र नागरिक समाजको पहलमा स्कूललाई जरिवाना गर्ने निर्णय गरिएको हो ।

पोखरा महानगरपालिका २० स्थित कालीखोलाको भीरबाट फालेको स्कूलका सञ्चालक रत्नमान गुरुङले स्वीकार गरेपछि फोहरमैला व्यवस्थापन ऐन २०६८ बमोजिम स्कूललाई ५० हजार जरिवाना गराउने निर्णय भएको पोखरा २० का वडाध्यक्ष सीम गुरुङले जानकारी दिए ।

आइतवार जनप्रतिनिधि, स्कूलका प्रतिनिधि र स्थानीयबीच छलफल भएको थियो । छलफलमा पोखरा महानगरले १५ हजार जरिवाना लिने प्रस्ताव गरेको थियो । तर स्थानीयको विरोधपछि महानगरले ५० हजार जरिवाना लिने निर्णय गरेको छ ।

वडाध्यक्ष गुरुङका अनुसार फालेको फोहोर सबै उठाएर लैजाने र आइन्दा फोहर यसरी नफाल्ने प्रतिबद्धता सहित ५० हजार जरिवाना तिराउने निर्णय भएको छ ।