अमेरिकाको अलास्कामा एक दन्तचिकित्सकले होभरबोर्डमा चढेर एक महिलाको दाँत निकालेको पाइएपछि दोषी ठहर गरिएको छ । त्यसपछि उनका बारेमा व्यापक अनुसन्धान गरिएपछि उनले स्वास्थ्य सेवा मेडिकएडबाट १९ लाख डलर ठगेको समेत पत्ता लाग्यो ।

सेथ लूकहार्ट नामक ती चिकित्सकले सन् २०१६ को जुलाई महिनामा क्लीयर क्रीक डेन्टलमा भेरोनिका विल्हेल्म नामक महिलाको दाँत झिक्न होभरबोर्ड प्रयोग गरेका हुन् । उनले तत्कालै दाँत निकालेर डेन्टल असिस्टेन्टलाई त्यो दाँत दिएका थिए र दुवै हात माथि उचालेर आफैंलाई बधाई दिँदै उपचारकक्षबाट बाहिरिएका थिए । 

यसको भिडियो क्लिप उनले आठजना साथीलाई पठाउँदै यो स्वास्थ्य सेवाको नयाँ मापदण्ड भएको बताएका थिए । 

शुक्रवार उनलाई स्वास्थ्यमा धोकाधडी, स्वास्थ्यको पैसा खाने योजना बनाएको, खराब आचरण देखाएको, अवैध रूपमा दन्तचिकित्सा गरेको र बिरामीको ज्यान जोखिममा पारेको आरोपमा दोषी ठहर गरिएको छ । 

एजेन्सी