नेपाल विद्युत् प्राधिकरणको गम्भीर लापरबाहीका कारण विद्युतीय सवारी चार्जिङ स्टेसन बन्द हुँदा सेवाग्राहीले दुख पाएका छन् ।

मधेस प्रदेशअन्तर्गत सिराहाको लहानमा प्राधिकरणले स्थापना गरेका चार्जिङ स्टेसन सोमवार बिहानदेखि चल्न सकेका छैनन् ।

आफ्नो गाडी चार्ज गर्न नसकेपछि लहानमै अड्केका अरुण कुमार सुवेदीले आफूसँग कुनै पनि उपाय नभएको भन्दै गुनासो गरेका छन् ।

उनले सामाजिक सञ्जाल फेसबुकमा लेखेका छन्, 'आज बिहानदेखि लहानका सबै ईभी चार्जिङ स्टेसन बन्द छन् । पोहोर दशैँमा पनि यही समस्या थियो । सेवाग्राही प्रतिको यो संवेदनहीनता र नेपाल विद्युत प्राधिकरणको अव्यवस्थाले दुख लागेको छ । लहान अफिसले केही रेस्पोन्स गरेन ।'

उनले आफूसँग भएको ईभीको कम्पनीमाथि पनि आक्रोश पोखेका छन् । गाडी बेच्ने तर चार्ज गर्ने स्टेसन नबनाउने उनको आरोप छ ।

यसबारे नेपाल विद्युत प्राधिकरणका कर्मचारीहरूले प्राविधिक समस्या भएकाले छिट्टै समाधान हुने बताउँछन् ।

'केही प्राविधिक समस्या देखिएको हो,' प्राधिकरणका एक कर्मचारीले लोकान्तरसँग भने, 'छिट्टै समाधान गर्ने प्रयत्न गरिरहेका छौं ।'

सिराहाको लहान क्षेत्रमा ३ वटा चार्जिङ स्टेसन छन् । विद्युतको भोल्टेज तलमाथि भइरहने भएकाले यी स्टेसन स्टेबल नभएको सेवाग्राहीले पटक-पटक गुनासो गर्ने गरेका छन् ।