प्रतिनिधि सभाको रिक्त एक सीटका लागि इलाम २ मा भएको निर्वाचनअन्तर्गत जारी मतगणनाको पहिलो नतिजा सार्वजनिक हुँदा नेपाली कांग्रेसका उम्मेदवार अगाडि देखिएका छन् । 

आइतबार दिउँसो सार्वजनिक भएको नतिजामा कांग्रेसका डम्बर खड्काले ६५७ मत पाएका छन् । 

नेकपा एमालेका सुहाङ नेम्वाङले ५३४ मत प्राप्त गरेका छन् । तेस्रोमा स्वतन्त्र उम्मेदवार डेकेन्द्र थेगिमले १८७ मत प्राप्त गरेका छन् । रास्वपाका मिलन लिम्बूले ११५ मत प्राप्त गरेका छन् । 

शुरुआती अग्रता लिएका खड्का २०७९ मंसिरमा सम्पन्न प्रतिनिधि सभा निर्वाचनमा एमाले उम्मेदवार सुवास नेम्वाङसँग मात्र ११४ मतले पराजित भएका थिए । 

नेम्वाङले ३० हजार २० मत पाउँदा खड्काले २९ हजार ९ सय ६ मत प्राप्त गरेका थिए । 

खड्काले आफू विगतमा झिनो मतले पराजित भएको घाइते उम्मेदवार भन्दै जनतासँग भोट मागेका थिए । अहिले सार्वजनिक भएको नतिजा प्रारम्भिक मात्र हो ।