क्यानडा र बेलायत पठाइदिन्छु भन्दै ठगी गरेको आरोपमा २ जना पक्राउ परेका छन् ।

पक्राउ पर्नेमा गोरखाको गण्डकी गाउँपालिका –२ का वकिलबहादुर आले र तनहुँको ऋषिङ गाउँपालिका–८ घर भई काठमाडौंको गोंगबु बस्ने धर्मेन्द्र श्रेष्ठ छन् ।

काठमाडौं उपत्यका अपराध अनुसन्धान कार्यालयले गोरखा प्रहरीको सहयोगमा आलेलाई गोरखाबाट पक्राउ गरी काठमाडौं ल्याएको हो ।

उनले राजन सुनारसहित ६ जनालाई क्यानडामा रोजगारीका लागि पठाइदिन्छु भनेर ३६ लाख ठगी गरेको आरोप प्रहरीको छ ।

आलेले क्यानडा जान प्रतिव्यक्ति १७ लाख लाग्ने र मासिक तलब एक लाख ८० हजार हुने भन्दै प्रलोभनमा पैसा लिएर फरार भएको पीडितहरूले दिएको जाहेरीमा उल्लेख छ ।

त्यस्तै श्रेष्ठले सुविना केसीसहित २ जनालाई बेलायत पठाइदिन्छु भनेर नौ लाख ५० हजार ठगी गरेको अनुसन्धान कार्यालयका प्रवक्ता एसपी रवीन्द्र रेग्मीले बताए ।