राति खेल्ने अभ्यास नहुँदा हाम्रा खेलाडी वेस्ट इन्डिजमा भौँतारिए– सांसद चौधरी

राति खेल्ने अभ्यास नहुँदा नेपालले टी–ट्वान्टी विश्वकपमा शनिवार दक्षिण अफ्रिकासँग हार व्यहोर्नु परेको एक सांसदले तर्क गरेका छन् । आइतवार प्रतिनिधिसभा बैठकमा बजेटमाथिको छलफलमा भाग लिँदै नागरिक उन्मुक्ति पार्टीका सांसद अरुण चौधरीले राति खेल्ने अनुभव नभएका कारण नेपाली खेलाडी वेस्ट इन्डिजमा भौँतारिएको बताएका हुन् । 

‘देखिएको कुरा के भने हाम्रा खोलाडीहरू एउटा त बाहिर गएर दक्षिण अफ्रिकासँग खेल्नु पर्ने । अर्को हाम्रा खेलाडीलाई राति खेल्ने प्राक्टिस छैन,’ उनले भने, ‘हिजो वेस्ट इन्डिजमा खेलिएको गेम लाइटमा थियो हाम्रा खेलाडी भौँतारिएकोजस्तो थियो ।’

उनले कुनै व्यवस्था गरेर खेल मैदानमा रात्रिकालीन बत्ती राख्ने व्यवस्था गर्न अर्थमन्त्रीको ध्यानाकर्षण गराए । ‘खेल मैदानमा, अरु नभएपनि क्रिकेट पिचमा लाइट लगाउने व्यवस्था गर्नु होला, हाम्रा खेलाडीले रातिमा प्राक्टिस गर्न सकुन्,’ उनले भने । शनिवार बिहान भएको खेलमा नेपाल अनुभवी टोली दक्षिण अफ्रिकासँग मात्र १ रनले पराजित भएको थियो ।