काठमाडौं – मार्भलको फिल्म एभेन्जर्स एन्डगेम सिनेमाकै इतिहासमा सबभन्दा धेरै कमाइ गर्ने फिल्म बन्न लागेको छ । मार्भल सिनेम्याटिक युनिभर्सभित्रको इन्फिनिटी सागालाई यो फिल्मले टुंग्याएको छ । 

यो फिल्मले जेम्स क्यामरोनको निर्देशनमा बनेको फिल्म अवतारको कीर्तिमान तोड्ने अपेक्षा गरिएको छ । अवतार क्रिसमसको समयमा रिलिज भएकाले बढी कमाउन उसलाई सहज भएको थियो । तर अब गर्मी महिनामा ठूला फिल्महरू पनि रिलिज हुन लागेकोले एन्डगेमको कमाइमा असर पर्न सक्छ । 

बक्स अफिस मोजोले सार्वजनिक गरेको आँकडाअनुसार, एन्डगेमले २.३४ अर्ब डलर कमाइसकेको छ । अवतारले सिनेमाघरबाट २.७८ अर्ब डलर कमाएको थियो । 

अमेरिकाको बजारको कुरा गर्दा शुक्रवार आएको डिटेक्टिभ पिकाचुले पहिलो दिनमा २०.७ मिलियन डलर कमायो र एन्डगेमलाई पछि पारिदियो । शुक्रवार एन्डगेमले १६.०६ मिलियन डलर कमायो । रिलिज भएपछि पहिलोपटक एन्डगेम शीर्ष स्थानबाट तल झरेको हो । 

अमेरिकामा एन्डगेमले ६७६.५० मिलियन डलर कमाइसकेको छ । 

भारतमा पनि एन्डगेमले अनेकौं कीर्तिमान तोडेको छ । तीन अर्ब भारुभन्दा बढी कमाइ गर्ने पहिलो हलिउड फिल्मका रूपमा एन्डगेमले आफूअघि आएको फिल्म इन्फिनिटी वार्सलाई पछि पारेको हो । 

एजेन्सी