प्रचण्डले भेट्न मानेनन् जयशंकरलाई !

भदौ ५, २०७६

काठमाडौं – सत्तारूढ दल नेपाल कम्युनिस्ट पार्टी (नेकपा) अध्यक्ष पुष्पकमल दाहाल ‘प्रचण्ड’ले नेपालको २ दिने भ्रमणमा आएका भारतीय विदेशमन्त्री एस जयशंकरसँग भेट्न अस्वीकार गरेका छन् ।

स्रोतका अनुसार जयशंकर बसेको होटेल द्वारिकाजमा प्रचण्डलाई भेटको निम्तो आएको थियो तर प्रचण्डले पार्टीको काम देखाएर भेट्न अस्वीकार गरे । 


ADVERTISEMENT

स्रोतले लोकान्तरलाई दिएको जानकारी अनुसार पूर्व प्रधानमन्त्रीसमेत रहिसकेका सत्तारूढ दलका अध्यक्ष प्रचण्ड आफैं गएर भारतको विदेशमन्त्रीलाई भेट्दा कूटनीतिक मर्यादाविपरीत हुने भन्दै प्रचण्डले भेट गर्न अस्वीकार गरेका हुन् ।

यद्यपि जयशंकरले निम्तो पठाएको समयमा पार्टीको सचिवालय बैठक चलिरहेको हुनाले आफू भेट्न नआउने भन्दै सूचना पठाएका थिए ।

जयशंकरले बुधवार नै प्रधानमन्त्री केपी शर्मा ओलीलाई भेटिसकेका छन् । दुवैबीच करीब १ घण्टा गोप्य वार्ता पनि भएको थियो । ओलीसँग जयशंकरले गरेको गोप्य भेटघाट कूटनीतिक मर्यादा विपरीत भएको भन्दै कतिपयले प्रश्न पनि उठाइसकेका छन् । 

होटेल द्वारिकाजमा जयशंकरलाई भेट्न प्रमुख प्रतिपक्षी दल नेपाली कांग्रेसका सभापति तथा पूर्व प्रधानमन्त्री शेरबहादुर देउवा, समाजवादी पार्टीका संघीय परिषद्का अध्यक्ष तथा पूर्व प्रधानमन्त्री डा. बाबुराम भट्टराई र सत्तारूढ दलका अन्य नेताहरू पुगे ।

२०७२ सालको चैतमा पनि प्रचण्डले जयशंकरलाई भेट्न अस्वीकार गरेका थिए । त्यतिबेला जयशंकर भारतका विदेश सचिवका रूपमा नेपाल आएका थिए । दक्षिण एसियाली क्षेत्रीय सहयोग संगठन (सार्क)को मन्त्रिस्तरीय बैठकमा भाग लिन आएका जयशंकरले प्रचण्डसँग भेट्न समय मागिसकेका थिए तर पार्टीको कामले दोलखा जानुपर्ने भन्दै प्रचण्ड बिहानै त्यता लागे । 

त्यसअघि नेपालको संविधान निर्माणको अन्तिम चरणमा रहँदा २०७२ सालको भदौमा जयशंकर भारतीय प्रधानमन्त्री मोदीका विशेष दूतका रूपमा काठमाडौं आएका थिए । 

उनले संविधान निर्माणको प्रक्रिया केही दिन पर सार्ने दबाब दिँदै प्रचण्ड लगायत परराष्ट्रमन्त्रीसमेत भइसकेका नारायणकाजी श्रेष्ठकै अगाडि ‘अभद्र’ व्यवहार देखाएपछि प्रचण्ड असन्तुष्ट बनेका थिए ।

भदौ ५, २०७६ मा प्रकाशित

ईश्वर अर्याल

पत्रकार अर्याल लोकान्तरका लागि राजनीति, समसामयिक घटनाक्रम र वैदेशिक रोजगारीमा रिपोर्टिङ गर्छन् ।

लेखकबाट थप...

प्रतिक्रिया दिनुहोस