काठमाडौं – जर्मनीमा अहिले माहुरी पालन जोडतोडका साथ गरिँदैछ । राजधानी बर्लिनमा मात्र १० हजार माहुरीका घार छन् । 

मानिसहरू माहुरी पालनमा दत्तचित्त भएर लागेका छन् । घरका बाल्कोनी र बाइकमा समेत माहुरी पालिरहेका छन् । 

जर्मन बीकीपर्स एसोसिएसनका सदस्यहरूमा विगत ६ वर्षमा निकै वृद्धि भएको छ । सन् २०१३ मा सदस्य संख्या ९२ हजार थियो भने सन् २०१९ मा यो संख्या बढेर एक लाख २० हजार पुगेको छ । 

बर्लिन बीकीपर्स एसोसिएसनका अध्यक्ष बेनेडिक्ट पोलाजेक भन्छन्, ‘जलवायु परिवर्तनका कारण माहुरीहरूको संख्या घटेकोमा मानिस चिन्तित छन् । माहुरीको संख्उा बढाउन उनीहरू प्रयास गर्न चाहन्छन् । शहरमा माहुरीको संख्या बढेको छ ।’

अहिले कार्यालय, घरका छत र होटलका कोरिडोरमा समेत माहुरीका घार देख्न पाइन्छन् । तर धेरैजसो माहुरीपालक सिकारु हुनु एक समस्या हो । उनीहरूलाई माहुरीपालनको धेरै जानकारी छैन । 

एसोसिएसनले ५० भन्दा बढी स्वयंसेवी नियुक्त गरेको छ र उनीहरू २४ घन्टा नै ड्युटी गरिरहेका हुन्छन् । माहुरी पालनबाट मानिसहरूलाई हानि त भइरहेको छैन भनी ती स्वयंसेवीले हेर्छन् । 

माहुरीका १०० घार बनाइसकेका जोनास हार्निङ भन्छन्, ‘माहुरीपालकको संख्यामा वृद्धि हुँदा मानिसहरूलाई हानि पनि भइरहेको छ । ठाउँ नमिलाइकन उनीहरू जताततै घार बनाइरहेका छन् ।’

माहुरी पाल्दा मानिसलाई सुरक्षित कपडा लगाउन सल्लाह दिइन्छ । 

हार्निङ भन्छन्, ‘माहुरीको कोलोनी बनाउनु पनि एक कला हो । रानी माहुरीलाई एक ठाउँमा राख्दा अन्य माहुरी उनलाई पछ्याउँदै त्यहीँ आइपुग्छन् ।’

एजेन्सी