जन्मथलो जाँदै प्रधानमन्त्री

आफ्नो जन्मदिन मात्र होइन, पार्टीका अन्य वरिष्ठ नेताहरूको जन्मदिनलाई पनि केक काटेर विशेष बनाइदिँदै आएका प्रधानमन्त्री केपी ओली जन्मदिन मनाउन यसपालि जन्मथलो तेहथुम पुग्ने भएका छन्। प्रधानमन्त्री ओलीको आइतबार ६९ औं जन्मदिन हो।

२००८ साल फागुन ११ मा तेह्रथुमको साविक इवा गाविसको सल्ले (हाल अठराई गाउँपालिका–४) मा ओली जन्मिएका थिए। ‘जन्मिएकै स्थानमा पुगेर प्रधानमन्त्रीले जन्मदिन विशष रुपले मनाउने कार्यक्रम बनाउनुभएको छ,’ नेकपा केन्द्रीय सदस्य एवम् तेह्रथुम जिल्ला सहइन्चार्ज विजय सुब्बाले अन्नपूर्णसँग भने, ‘त्यसका लागि उहाँ (प्रधानमन्त्री) आइतबार तेह्रथुम जाँदै हुनुहुन्छ।’


Advertisement

ओलीले गत वर्ष प्रधानमन्त्री निवासमै जन्मदिन मनाएका थिए। प्रधानमन्त्री नहुँदा उनले भक्तपुर बालकोटस्थित निजी निवासमा ‘सेलिब्रेट’ गर्ने गरेका थिए।

ओलीले जन्मदिनमा त्यहाँका जेष्ठ नागरिकलाई सम्मान गर्ने र विद्यार्थीलाई शैक्षिक सामग्री वितरण गरेर खुसीयाली साट्ने योजना बनाएका छन्। ‘उहाँको जन्मघरमा कार्यक्रम राखिएको छ। त्यहाँ उहाँले जेष्ठ नागरिकलाई सम्मान गर्नुहुनेछ। विद्यार्थीलाई शैक्षिक सामग्री वितरण गर्ने कार्यक्रम छ’, सुब्बाले भने।


Advertisement

ओलीको बाल्यकाल असाध्यै दुःखका साथ बितेको थियो। उनी सानैमा आमा गुमाएर टुहुरो बने। उनले अर्काको घरमा गोठालो बसेर बाल्यकालको शिक्षा लिएका थिए। परिवारको दुःखका कारण ओलीका पिता मोहनप्रसाद २०२४ सालमा तेह्रथुमको घरजग्गा बेचेर झापाको दमक झरेका थिए।

उनका पिताले साढे ११ हजार रुपैयाँमा बेचेको घर २०७२ सालमा फिर्ता लिएको सांसद सुब्बा बताउँछन्। ओलीसँग प्रधानमन्त्रीको सचिवालयको टिम तेहथुम जानेछन्। त्यस्तै भौतिक पूर्वाधारमन्त्री वसन्त नेम्वाङ र खानेपानी मन्त्री विना मगर पनि त्यहाँ पुग्नेछन्। ‘प्रधानमन्त्रीको जन्मघरमा जन्मदिनमा विशेष कार्यक्रम आयोजनादेखि अरु योजनाका कार्यक्रम पनि छन्, पाँचथरमा खानेपानी उदघाटन, प्रधानमन्त्रीको घर गाउ देखि पर ताप्लेजुङ जाने बाटो छ। सल्लेबाट ताप्लेजुङ ढुंगेसाँघु जोड्ने सडक शिलान्यासको पनि कार्यक्रम छ,’ सुब्बाले भने, ‘प्रधानमन्त्री आइतबार नै काठमाडौं फर्किनुहुन्छ।’

ओलीले जन्मदिनकै अवसर पारेर शनिबार बालुवाटारमा आफ्नो पुस्तक ‘भिजन टु एक्सन’ को विमोचन गरेका छन्। पुस्तक सार्वजनिक शताब्दी पुरुष सत्यमोहन जोशी र राष्ट्रकवि माधव घिमिरेले गरेका थिए। अन्नपूर्ण पोस्टमा खबर छ ।

छापाबाट
छापाबाट

लेखकबाट थप...

कमेन्ट गर्नुहोस्