चीनमा शनिवार कोभिड–१९ भनिने कोरोनाभाइरसका नयाँ केसमा तीव्र गिरावट आएको छ । तर विश्व स्वास्थ्य संगठनका अधिकारीहरूले अहिले नै कुनै किसिमको भविष्यवाणी गर्नु हतार हुने जनाएका छन् किनकि भाइरस अन्य देशमा फैलिरहेको छ । 

चीनमा शनिवार ३९७ केस पुष्टि भएको छ जबकि शुक्रवार ८८९ केस थिए । 

तर दक्षिण कोरिया, इरान, इटली र लेबनानमा यो भाइरस तीव्र गतिमा फैलिरहेको छ । 

दक्षिण कोरियाका अधिकारीहरूका अनुसार, शनिवार भाइरसको केस दुईगुणा बढेर ४३३ पुग्यो । केसहरूको संख्या एक हजार पुग्ने बताइएको छ ।

इरानमा अघिल्लो साताको आरम्भतिर एक व्यक्तिलाई भाइरसले समातेकोमा शनिवारसम्ममा १० वटा नयाँ केस आए र दुईजनाको मृत्यु भयो । त्यहाँ अहिले २९ मानिस कोरोनापीडित छन् समग्रमा ६ जनाको ज्यान गइसकेको छ । 

विश्व स्वास्थ्य संगठनले चीनमा नयाँ केसको संख्या घटेकोमा खुशी व्यक्त गरे पनि अन्य देशमा संक्रमण फैलिएकोमा चिन्ता व्यक्त गरेको छ । ती देशमा चीनसँगको लिंक स्पष्ट छैन । 

अतिसंवेदनशील देशहरूका लागि ६७५ मिलियन डलरको सहायता रकम विश्व स्वास्थ्य संगठनले मागेको छ । चीनसँग निकट सम्बन्ध भएका अफ्रिकाका १३ देशलाई प्राथमिकतामा राखिएको छ । 

विश्व स्वास्थ्य संगठनका अनुसार, चीनमा कोरोनाभाइरसका ७५ हजार ५६९ केस देखिएका छन् भने दुई हजार २३९ जनाको मृत्यु भइसकेको छ । उपलब्ध तथ्यांक अनुसार, ८० प्रतिशत रोगीमा मध्यम दर्जाको संक्रमण छ भने १८ प्रतिशत केसमा गम्भीर र २ प्रतिशत केसमा ज्यानमारा साबित भइरहेको छ । 

चीनबाहिर २६ देशमा भाइरस फैलिएको छ ।