उदयपुरकी विष्णु अधिकारी कतार एयरलाइन्सबाट कतार हुँदै साइप्रस पुगिन् । त्रिभुवन विमानस्थल र कतारको ट्राञ्जिटमा उनलाई कुनै रोकतोक भएन, साइप्रस पुगेपछि भने उनलाई विमानस्थलमै रोकियो ।

उनी कतारमा लगभग ५ घण्टाको ट्रान्जिटपछि साइप्रस पुगेकी थिइन्, साइप्रसले उनलाई कोरोना नलागेको मेडिकल सर्टिफिकेट ल्याएपछि मात्र विमानस्थलबाट बाहिर निस्किन दिने भन्दै फिर्ता पठायो ।

७ वर्षदेखि साइप्रस बस्दै आएकी अधिकारी २२ दिनको बिदामा नेपाल आएकी थिइन् । क्यारेन्टाइनमा बस्छुभन्दा पनि उनलाई साइप्रस प्रवेश गर्न दिइएन । 

नेपालबाट विदेश जाँदा नेपालको सरकारी निकाय तथा विमानस्थलमा कुन देशमा जान पाइन्छ, कुनमा पाइँदैन भन्ने कुरा स्पष्ट रूपमा नबताइदिँदा समस्या भएको उनको गुनासो छ ।

‘नेपालमा कुनै राम्रो सूचना प्रवाह भएको भए हामीजस्ता विदेश जानेले दुःख पाउने थिएनन् नि ?’ अधिकारीले लोकान्तसँग भनिन्, ‘न नेपालमा कसैले भन्यो, न त लैजाने एयरलाइन्सले नै ।’

साइप्रसबाट फर्काइएपछि उनी कोरोना भाइरस (कोभिड–१९) नलागेको मेडिकल सर्टिफिकेट लिन शुक्रराज ट्रपिकल तथा सरूवा रोग अस्पतालमा आइन् ।

सरकारी काम ढिला हुने अनुमानमा उनले आफन्तलाई पहिले नै लाइनमा बस्न भनेकी थिइन्, तर उनको अनुमान गलत साबित भयो । भीडभाड नभएकाले सबै काम एक घण्टाभित्रै सकियो ।

लोकान्तरकर्मी मंगलवार शुक्रराज ट्रपिकल तथा सरूवा रोग अस्पताल टेकु पुग्दा बिरामीहरूको चाप निकै कम थियो ।

कोरोनाको संक्रमण विश्वभरी फैलिरहेको अवस्थामा नेपालको सरकारीमध्येको एक मात्र सरूवा रोग अस्पतालमा उपचारका लागि जाने बिरामीको संख्यामा कमी आएको हो । 

सरूवा रोग अस्पतालका अधिकांश बेडहरू खाली देखिन्थे । अस्पतालको प्रायःजसो वार्डमा बिरामी फाट्टफुट्ट देखिन्थे ।

‘पहिलाभन्दा अहिले बिरामीको चाप कम छ । कोरोनाको संक्रमण फैलिएको सुनेपछि त अझ कम भए, बिरामीलाई औषधि खुवाइरहेकी एक स्टाफ नर्सले लोकान्तरकर्मीसँग भनिन् ।

अस्पतालको भुँइतलाको बेड नम्बर ४, ५, १०, १३, २५, २७, २८, ३५, ३६, ३७ लगायतका धेरैजसो बेड खाली थिए ।

टिकट काट्ने ठाउँमा पनि मानिसहरूको ठूलो लाइन देखिएन । 

दिनकैजसो स्वास्थ्य परीक्षणका लागि मानिसहरू लिएर आउने एक म्यानपावरका कर्मचारीले विक्रम (नाम परिर्वन)का अनुसार २/३ हप्ता अगाडि टेकु अस्पतालमा निकै भीडभाड हुन्थ्यो, तर अहिले निकै खुला छ, मानिसहरू निकै कम भएका छन् ।

बिदा नबस्न निर्देशन

विश्वभर कोरोनाको संक्रमण फैलिएपछि सरूवा रोग अस्पताल टेकुमा कार्यरत डाक्टर, कर्मचारी र स्टाफनर्सहरूलाई बिदा नबस्न निर्देशन दिएको अस्पतालमा कार्यरत स्टाफ नर्सले लोकान्तरलाई बताइन् । 

‘हामीलाई बिदा नबस्न भनेर अस्पतालले निर्देशन नै जारी गरेको छ । अहिले कोही पनि बिदा बस्न पाइँदैन, र बस्नु पनि भएको छैन,’ ती स्टाफ नर्सले भनिन् ।

अस्पतालमा कार्यरत कर्मचारीहरूको नियमित स्वास्थ्य परीक्षण हुने गरेको र मास्क तथा स्यानिटाइजर उपलब्ध गराएको त्यहाँ कार्यरत कर्मचारीहरूले बताए ।

हेर्नुहोस्, भिडियो :

फोटो/भिडियो : रोजन श्रेष्ठ