सेनाका सबै ब्यारेक र गणहरू ‘लकडाउन’ जस्तै, सुरक्षा निकाय उच्च सतर्क

कोरोना भाइरस संक्रमण (कोभिड–१९) को उच्च जोखिम रहेको नेपालमा तीनै तहका सुरक्षा निकाय उच्च सतर्कताका साथ तयारीमा जुटेका छन् ।

सीमा जोडिएका देश चीन र भारतमा समेत संक्रमण फैलिएका बेला नेपालमा रोगको प्रवेश हुन नदिन र प्रवेश भइहाले तत्कालै काम गर्न सक्ने गरी सुरक्षा निकायले एकल तथा संयुक्त प्रयासमा आइसोलेसन वार्ड, क्वारेन्टाइन भवन बनाउनेदेखि हेल्थ डेस्क स्थापना गर्ने र सीमा क्षेत्रको निगरानी गरिरहेका छन् ।  

नेपाल प्रहरीले अहिले १३ हजारभन्दा बढी जनशक्ति कोभिड–१९ कै लागि प्रशिक्षण दिएर तयारीमा राखेको केन्द्रीय प्रहरी प्रवक्ता प्रहरी नायब महानिरीक्षक शैलेश थापा क्षेत्रीले जानकारी दिए । ‘आवश्यक पर्दा जनशक्ति जुनसुकै बेला ‘मुभ’ हुनेछन्, त्यसमा प्रहरीले पूर्ण तयारी गरेको छ,’ प्रवक्ता क्षेत्रीले भने । उनले जिल्ला र केन्द्रमा कोरोनासम्बन्धी हेल्थ डेस्क स्थापना गरिएको जानकारी दिए ।

प्रहरीको २ नम्बर गणमा ५० शय्याको क्वारेन्टाइन भवन र नेपाल प्रहरी अस्पतालमा २० शय्याको आइसोलेसन वार्ड तयार पारिएको जानकारी दिए ।

शुक्रवार भिडियो कन्फ्रेन्समार्फत सातै प्रदेशमा उच्च सतर्कता अपनाउन निर्देशन दिइसकेको उनले जानकारी दिए । सीमा क्षेत्रमा समेत कतिपय ठाउँमा प्रहरीले आफ्नै तरिकाले हेल्थ डेस्क स्थापना गरेको र कतिपय स्थानमा सशस्त्र प्रहरीसँगको समन्वयमा डेस्क स्थापना गरेर निगरानी भइरहेको छ ।

कतिपय स्थानमा स्वास्थ्य संस्थासँग समन्वय गरेर डेस्क स्थापना गरिएको छ । दिपायल, नेपालगञ्ज र सप्तरीमा रहेको प्रहरी अस्पताल पनि आवश्यक तयारीका साथ बसेको उनले बताए ।

सशस्त्र प्रहरी बल नेपाल पनि आवश्यक तयारी जुटेको छ । नेपालमा कोरोनाको संक्रमण नभए पनि सम्भावित जोखिम रोक्न र रोग भित्रिएमा तत्काल परिचालन हुने गरी सशस्त्र प्रहरीले तयारी गरेको प्रवक्ता सशस्त्र प्रहरी नायब महानिरीक्षक प्रविनकुमार श्रेष्ठले जानकारी दिए । आवश्यक परेको खण्डमा १ हजार व्यक्तिलाई उपचार गर्न सक्ने गरी क्षेत्र छुट्याएर आइसोलेसन र क्वारेन्टाइनका लागि आवश्यक तयारी थालिएको उनले जानकारी दिए ।

नेपाल प्रहरी तथा विभिन्न स्वास्थ्य संस्थासँगको समन्वयमा सीमा क्षेत्र र मानिसको आवतजावत गर्ने क्षेत्रमा सशस्त्र प्रहरी परिचालन गरिएको छ । सीमा आसपास १४२ स्थानमा हेल्थ डेस्कमार्फत सेवा दिइरहेको श्रेष्ठले जानकारी दिए ।

सेनाको यस्तो छ तयारी

नेपाली सेना पनि संयुक्त र आफ्नै प्रयासमा कोरोना रोकथाम तथा नियन्त्रणका लागि उच्च तयारीका साथ काम गरिरहेको छ । सेनाका प्रवक्ता विज्ञानदेव पाण्डेका अनुसार केन्द्रमा केही दिनअघि मात्रै सीमित स्रोत साधनका बीच कसरी काम गर्न सकिन्छ भनेर पूर्वाभ्यास नै गरिएको थियो । काठमाडौंमा ५४ टेन्ट बनाएर सफल अभ्यास गरिएको थियो । नेपालगञ्ज, इटहरी र पोखरामा रहेको क्षेत्रीय अस्पतालले समेत आफ्नो आवश्यक तयारी गरेर सेना बसेको छ । 
सातै प्रदेशका पृतनामा रहेका साना अस्पतालले प्रदेश सरकारसँग मिलेर आइसोलेसन र क्वारेन्टाइन बनाएको उनले बताए । पूर्वी पृतनाले प्रदेश सरकारसँग मिलेर मोरङ, झापा, उदयपुरमा झण्डै ४०० शय्याको छुट्टै क्याम्प (आइसोलेसन वार्ड) बनाइसकेको प्रवक्ता पाण्डेले जानकारी दिए ।

अन्य पृतनाले पनि आवश्यक तयारी गरिरहेको छ । केन्द्रबाट पठाउने स्रोत सामग्रीहरू पठाउने क्रम जारी रहेको र भूकम्पका बेलाका सामग्री, टेन्ट सबै प्रयोग हुँदैछ । सेनाले सबै पृतनालाई आकस्मिक कोषका रुपमा २५ लाख रुपैयाँका दरले दिइसकेको छ । त्यसबाट तयारी भइरहेको छ । सरकारले आईसीयू सहितको २० श्यया बनाउन निर्देशन दिएअनुसार वीरेन्द्र सैनिक अस्पतालमा त्यसको तयारीको काम भइरहेको प्रवक्ता पाण्डेले बताए ।

उनले भने, ‘हाम्रा सबै ब्यारेक, गणहरू ‘लकडाउन’ जस्तै छ, बिदा भएर आउनेलाई अलग्गै क्वारेन्टाइनमा राखिन्छ, बिदा छुट्टी सबै बन्द भइसक्यो, आन्तरिकसँगै बाह्य सावधानी, रोकथाम र नियन्त्रणका लागि सेना पूर्ण तयारीमा छ ।’ उनले कोरोना भाइरस संक्रमण (कोभिड–१९) को रोकथाम र नियन्त्रणका लागि ‘कोर’ समूह तयार पारिएको जानकारी दिए । 

कुन ब्यारेक र गणमा सिपाही र कमाण्डर को–को खटिने सबै तयारीमा छ, सेनाका चिकित्सक र स्वास्थ्यकर्मी कसरी परिचालन हुने आइसोलेसनमा कसरी काम गर्ने, क्वारेन्टाइनमा सेनाको भूमिका कस्तो रहन्छ सबै कुराको तयारीमा नेपाली सेना रहेको छ । केन्द्रमा १० श्ययासहित विभिन्न स्थानमा गरी ५२ श्ययाको आइसोलेसन वार्डसमेत सेनाले तयारी अवस्थामा राखेको जनाइएको छ । 

सरकारको उच्च सतर्कता

सरकारले कोभिड–१९ भित्रिन नदिन उच्च सतर्कता अपनाएको छ । मुलुकमा भोलि आइतवारदेखि यही चैत २१ गतेसम्म सार्वजनिक र निजी क्षेत्रबाट प्रदान गरिने अत्यावश्यक बाहेकका सबै सेवा बन्दको घोषणा गरिसकेको छ । चैत १० गतेदेखि लागू हुनेगरी केही अवधिका लागि लामो दूरीमा चल्ने सबै यात्रुवाहक सवारी साधन बन्द गरेको छ । 

अत्यावश्यक अवस्थामा बाहेक घरबाट बाहिर ननिस्कन, भीडभाडमा नजान, सरसफाइमा ध्यान दिन, अनावश्यकरूपमा खाद्यान्नको सञ्चित नगर्न, चिकित्सकको सल्लाह लिन र आतंकित नहुन पनि सरकारले आह्वान गरिसकेको छ । यही चैत ९ गतेदेखि १८ गतेसम्म हवाईमार्ग हुँदै नेपाल आगमनमा रोक लगाउन शुक्रवार प्रधानमन्त्री केपी शर्मा ओलीले घोषणा गरिसकेका छन् ।

सबै सीमानाकाबाट आवागमन गर्ने यात्रुको अनिवार्य स्वास्थ्य जाँच गरिने, देशभर स्वास्थ्य सेवा प्रभावकारी बनाइने भएकाले उच्च मनोबलका साथ कोरोना भाइरसलाई परास्त गर्ने उनले आह्वान गरे । चीनको वुहानमा गत डिसेम्बर ३१ मा कोभिड–१९ मानिसमा देखिएको थियो । यो कोरोनाको सातौं प्रजातिमा पर्छ । जनावरबाट मानिसमा सरेको भनिएपछि कुन जनावरबाट सरेको भनेर पत्ता लागेको छैन । विश्व स्वास्थ्य संगठनका अनुसार अहिलेसम्म १७७ मुलुकमा २ लाख ३४ हनार ७३ जना संक्रमित भइसकेका छन् । जसमा ९ हजार ८४० जनाको मृत्यु भइसकेको छ । कोभिड–१९ को नेपाल उच्च जोखिममा रहे पनि अहिलेसम्म संक्रमण देखिएको छैन ।

भारतको सीमानाकाबाट बढी जोखिम रहेकाले अहिले सरकारले सीमामा उच्च निगरानी बढाउँदै आएको छ । – नारायण ढुंगाना/रासस

कोरोनाले मान्छे मरेको भनेर अफवाह फैलाउने पक्राउ

काठमाडौंको नर्भिक अस्पतालमा कोरोना भाइरसको संक्रमणले मान्छेको मृत्यु भएको भनेर अफवाह फैलाउने रामेछापका विवेक थापा मगरलाई प्रहरीले पक्राउ गरेको छ ।

साइबर अपराध अनुसन्धान ब्यूरोका एसएसपी नविन्द्र अर्यालले भक्तपुर सिपाडोलमा अनाधिकृत रुपमा अनलाइन सञ्चालन गर्दै आएका थापा मगरलाई विद्युतीय कारोबार ऐन २०६३ अन्तर्गत कारवाही प्रक्रिया अगाडि बढाइने बताए ।

मगरले नर्भिक अस्पतालमा मान्छे मरेको भनेर तयार पारेको अडियो सन्देश सामाजिक सञ्जालमा भाइरल भइरहेको छ ।

अस्पतालले शनिवारै विज्ञप्ति जारी गर्दै अडियो सन्देश भ्रामक भएको स्पष्ट पारिसकेको छ ।

पत्रकार महासंघको निर्णय : ‘गलत र अफवाहपूर्ण प्रचार हुन नदिन भूमिका खेल्ने’

नेपाल पत्रकार महासंघले कोरोना भाइरसको विश्वव्यापी महामारीबीच गलत र अफवाहपूर्ण सूचना प्रचार हुन नदिन भूमिका खेल्ने निर्णय गरेको छ ।

शनिवार बसेको महासंघ केन्द्रीय समितिको बैठकले पत्रकार र सञ्चारमाध्यमले दायित्व पूरा गर्ने, सही सूचना सम्प्रेषण गर्ने लगायत निर्णय गरेको छ ।

महासंघले पत्रकारलाई घरबाटै काम गर्ने वातावरण मिलाउन र अफिस पाउनै पर्ने भए सवारीसाधनको व्यवस्था गर्न समेत सञ्चारमाध्यमलाई आग्रह गरेको छ ।

कठिन अवस्थामा सूचना सम्प्रेषणको दायित्व पूरा गर्ने सञ्चारमाध्यम र पत्रकारलाई टेलिफोन, इन्टरनेट लगायतमा सहुलियत दिन समेत महासंघले सरकारसमक्ष माग गरेको छ ।

कोरोनाविरुद्ध खटिन सेनाका ५ हजार स्वास्थ्यकर्मी ‘हाईअलर्ट’ 

नेपाली सेनाले कोरोना (कोभिड–१९) को जोखिम नियन्त्रण तथा रोकथामका लागि प्रदेश सरकारसँग समन्वय गरी योजना बनाउने काम अघि बढाएको छ ।

सेनाले जोखिम रोकथाम र नियन्त्रणका लागि प्रदेश सरकारलाई आवश्यक सहयोग गर्ने जनाएको छ ।

यसका लागि सेनाले मातहतका पृतना, बाहिनी र गुणस्तरमा आफ्नो तयारी गरिरहेको छ । सरकारले सेनालाई कोभिड–१९ को जोखिम रोकथाम र उपचारका लागि २० वटा सघन उपचार कक्ष निर्माण गर्न आवश्यक बजेट उपलब्ध गराउने घोषणा गरिसकेको छ ।

भाइरसका बिरामी देखिएमा आइसोलेसन र क्वारेन्टाइनमा कसरी राखेर उपचार गर्ने भनी आन्तरिक तयारीस्वरुप सेनाले उपचार विधि, प्रक्रिया र अपनाउनुपर्ने आवश्यक सजगताबारे ५० चिकित्सकसहित १८१ जनालाई प्रशिक्षण दिइसकेको छ । ती जनशक्तिले केन्द्रमा १० सहित मुलुकभर ५२ स्थानमा नमूना क्वारेन्टाइन र अस्पताल तयार गरिसकेका छन् ।

सेनाको पूर्वी पृतना मातहत विभिन्न ३ स्थानमा ४४४ शय्याको क्वारेन्टाइन तयार गरिसकेको सैनिक जनसम्पर्क तथा सूचना निर्देशनालयका निर्देशक एवं प्रवक्ता विज्ञानदेव पाण्डेले जानकारी दिए । सेनाले कोरोना भइरसबाट सुरक्षित रहन र आवश्यक परेको बखत चुस्त–दुरुस्त रुपले परिचालन हुन सैनिकलाई बिदा बस्न बन्देज लगाइसकेको छ । 

सरकारको निर्णयअनुसार एकै पटक धेरै मानिस एकै स्थानमा जम्मा हुन नदिने हेतुले स–साना समूहमा रहेर बिहान–बेलुका खाना खुवाउने प्रबन्ध मिलाएको सेनाले जानकारी दिएको छ । सेनाले संगठनभित्र स्वास्थ्यसम्बन्धी तालिम लिएका ५ हजार व्यक्तिको रोस्टर तयार गरिसकेको जनाएको छ । 

जनशक्तिलाई आवश्यकताअनुसार परिचालन गर्न तयारी हालतमा राखेको जानकारी दिइएको छ । सेनाले अहिले स्वास्थ्यसम्बन्धी तालिम लिएका भूतपूर्व सैनिकको पनि खोजी गरिरहेको छ ।

सेनाले हेलिकोप्टरबाट औषधि छर्कने बेलामा सर्वसाधारण घरभित्रै बस्नुपर्छ भन्ने ढुंगबाट आएको हल्लामा कुनै सत्यता नरहेको स्पष्ट पारेको छ ।

आइसोलेशनमा रहेका बिरामीमा देखिएन कोरोना

सिन्धुली जिल्ला अस्पतालमा कोभिड–१९ को आशंकमा आइसोलेशनमा राखेर उपचार गरिएका एक जना बिरामीमा कोरोना नभएको पुष्टि भएको छ ।

काठमाडौ टेकुस्थित केन्द्रीय जनस्वास्थ्य प्रयोगशालामा गरिएको परीक्षणमा इन्फ्लुएञ्जा ए पोजेटिभ र कोभिड–१९ नेगेटिभ भेटिएको अस्पतालका प्रवक्ता डा प्रसन्न राजभण्डारीले जानकारी दिए । 

गत बुधबार ज्वरो अत्याधिक आएपछि अस्पतालमा ल्याइएका कमलामाई नगरपालिका–७ का ८१ वर्षीय वृद्धलाई अस्पतालको आइसोलेशन वार्डमा  भर्ना गरिएको थियो ।

यसैविच सिन्धुली अस्पतालले फिबर क्लिनिक आइतबारदेखि सञ्चालन हुने भएको छ । खोकी तथा ज्वरो आएका बिरामीको उपचार छुट्टै गर्ने व्यवस्था मिलाइएको अस्पताल सञ्चालन तथा व्यवस्थापन समितिका अध्यक्ष प्रल्हाद पोख्रेलले जानकारी दिए । अस्पतालले कोरोनाको जोखिम हुन नदिन यसअघि साबुनपानीले हात धुने व्यवस्था मिलाएको थियो ।

शुक्रबार  सहायक प्रजिअ विजया प्रसाईंको नेतृत्वमा बसेको सरोकारवाला निकायको बैठकले कमलामाई नगरपालिका–६ माझिटारमा खाली रहेको भूसंरक्षणको कार्यालयलाई क्वारेन्टाइनस्थल बनाउने निर्णय गरेको हो ।

बैठकले जिल्लाका सबैै स्थानीय तहको समन्वयमा सचेतनामूलक अभियानहरू सञ्चालन गर्ने, कोरोना भाइरस जोखिम  रोकथाम तथा बच्ने उपायसहित पर्चा, पम्प्लेट जस्ता सामग्रीका माध्यमबाट प्रचारप्रसारको अभियान चलाउने निर्णय पनि गरेको छ ।

कतार र भारतमा अलपत्र १६३ नेपालीको उद्धार, खरिपाटी क्वारेन्टाइनमा राख्दै सेना 

कतार र भारतका विमानस्थलमा अलपत्र परेका १६३ नेपालीको उद्धार गरिएको छ ।

उपप्रधान तथा रक्षामन्त्री ईश्वर पोखरेल नेतृत्वको कोरोना भाइरस संक्रमण रोकथाम तथा नियन्त्रण उच्च स्तरीय समन्वय समितिको शुक्रवारको निर्णय अनुसार नेपालीलाई उद्धार गरेर स्वदेश ल्याइएको हो ।

विदेशमा अलपत्र नेपालीलाई स्वदेश ल्याएर नेपाली सेनाले क्यारेन्टाइनमा राख्न लागेको छ । भारतको विमानस्थलबाट २८ जना र कतारबाट १३५ जना नेपालीलाई उद्धार गरेको ल्याइएको छ ।

नेपाली सेनाले क्वारेन्टाइनको लागि भक्तपुरको चाँगुनारायणस्थित खरीपाटीमा नेपाल विद्युत् प्राधिकरणको तालिम केन्द्रमा बनाएको क्वारेन्टाइन सेन्टरमा राख्न लागेको नेपाली सेनाका प्रवक्ता विज्ञानदेव पाण्डेले लोकान्तरलाई बताए ।

विदेशमा अलपत्र नेपालीको उद्धार गर्नुपर्ने माग बमोजिम उच्चस्तरीय समितिले शुक्रवार उद्धार गरेर ल्याउने निर्णय गरेको थियो ।