कर्णाली प्रदेशमा आगामी डेढ महिनाका लागि पुग्ने चामल सञ्चित रहेको खाद्य संस्थानले जानकारी दिएको छ ।

नेपाल खाद्य संस्थान सुर्खेतका प्रमुख भीमबहादुर थापाका अनुसार कर्णालीमा आगामी डेढ महिनासम्म लकडाउन जारी भएपनि चामल अभाव नहुने भएको हो ।

जिरा मसिनो, स्टिम जिरा, सोना मन्सुली र जापानीज चामलको विक्री वितरण गरिरहेको संस्थानसँग अहिले सुर्खेतमा ७ हजार ४०५ क्विन्टल मौज्दात रहेको छ । कर्णालीका दश जिल्लामा हाल २९ हजार ५०५ क्वीन्टल चामल रहेको उनको भनाइ छ ।

थापाका अनुसार सुर्खेतमामा ७ हजार चार सय पाँच क्विन्टल, हुम्लामा ६ हजार १६० क्विन्टल, मुगुमा तीन हजार सत्तरी क्विन्टल, डोल्पामा चार हजार ६२५ क्विन्टल, जुम्लामा १५ सय तीस क्विन्टल, दैलेखमा २६४ क्विन्टल, कालिकोटमा २ हजार ८०६ क्विन्टल, जाजरकोटमा तीन हजार ४६० क्विन्टल र रुकुम पश्चिममा १८५ क्विन्टल चामल मौज्दात रहेको छ ।

सल्यानमा द्धन्द्धको बेलामा खाद्य डिपो सञ्चालन हुन बन्द भएपछि अहिलेसम्म सञ्चालन हुन सकेका छैनन् । त्यहाँकोलागि दांगले नै हेर्दै आइरहेको प्रमुख थापाको भनाइ छ ।

प्रदेश सरकार र स्थानीय तहले पनि राहत वितरण गर्ने भन्दै संस्थानबाट पाँच हजार तीन सय दुइ क्विन्टल चामल लगेको थापाको भनाइ थियो ।

‘प्रदेश सरकारको उद्योग पर्यटन बन तथा वातावरण मन्त्रालयले २० क्विन्टल ८५ केजी, सामाजिक विकास मन्त्रालयले १८ क्विन्टल तीस केजि, वीरेन्द्रनगर नगरपालिकाले तीन हजार ८ सय ३९ क्विन्टल १९ केजी, लेकबेशी नगरपालिकाले सात सय ४९ क्विन्टल २५ केजी, बराहताल गाउँपालिकाले पाँच सय ९क्विन्टल ९० केजी, चिंगाड गाउँपालिकाले १५ क्विन्टल र दैलेखको ठाटीँकाँध गाउँपालिकाले एक सय ५० क्विन्टल चामल खरिद गरेर लिएका छन् ।’

खाद्य संस्थानले अहिले हरेक चामलको दर रेटमा दश प्रतिशत छुट दिइरहेको छ । जसका कारण विक्री दर पनि बढेको उनको भनाइ छ ।

‘लकडाउनको सुरु सुरुमा त्यति धेरै विक्री भएको थिएन । प्रदेश सरकारले नाका बन्द गरेसँगै अहिले नागरिकको भीड लाग्ने गरेको छ । प्रति व्यक्ति ६० केजी सम्म हामीले चामल दिइरहेका छौं,’ उनले भने, ‘अहिले सरदर संस्थानबाटै एक सय २५ क्विन्टल जति चामल विक्री भइरहेको छ ।’

उनले चामल अभाव हुने अवस्था कर्णालीमा नआउने बताए । ‘अहिले पनि हामीसँग पर्याप्त चामल छ । दाल भने छैन । यदि अभाव भइहाल्यो भने पनि  विर्तामोड झापा र नेपालगञ्ज श्रोत केन्द्रबाट चामल मगाउँछौं,’ उनले भने, ‘यसका अलावा बर्दियामा अहिले धान कुटान सुरु भइसकेको छ । त्यहि चामल कर्णाली ल्याउने छौं । चामल अभाव हुन हामी दिने छैनौं ।’

संस्थान कार्यालय सुर्खेतमा चैत ११ गते अघि १७ हजार क्विन्टल चामल रहेकोमा कार्यालयले थप १० हजार क्विन्टल चामल खरिद गरेको थियो । यसका साथै कर्णालीका लागि २० हजार क्विन्टल चामल खरिद गर्न भन्दै संस्थानले टेण्डर आव्हान गरिसकेको प्रमुख थापाको भनाइ छ ।