१५ दिनको स्थगनपछि सत्तारुढ नेपाल कम्युनिस्ट पार्टी (नेकपा) स्थायी कमिटीको बैठक शुक्रवार बस्दैछ ।

प्रधानमन्त्री निवास बालुवाटारमा बिहान ११ बजेपछि बस्ने बैठकमा पार्टीभित्र देखिएको बिबाद समाधानका लागि केन्द्रीय कमिटीको बैठक बोलाउने एजेण्डामा छलफल हुने एक स्थायी कमिटी सदस्यले जानकारी दिए ।

सहमतिका लागि पटक पटक भएका प्रयास असफल भएपनि नेकपा नेतृत्व केन्द्रीय कमिटी बोलाएर निर्णयमा पुग्ने सहमतिमा पुगेको थियो ।

असार १० गतेबाट शुरु बैठकमा अध्यक्ष पुष्पकमल दाहाल प्रचण्ड लगायतका नेताहरुले प्रधानमन्त्री एवं अध्यक्ष केपी शर्मा ओलीको राजीनामा माग गरेपछि बिबाद बल्झिएको थियो । 

ओलीको राजीनामा माग गरिएपछि सहमति खोज्न भन्दै असार १८ गतेदेखि केन्द्रीय कमिटी बैठक स्थगित गरेर अध्यक्षद्वय ओली र प्रचण्डले सहमतिको प्रयास गरेका थिए ।

बिहीवार माधवकुमार नेपालसहित तीन नेताबीच भएको छलफल समेत निष्कर्षमा पुग्न नसकेपछि नेकपा बिबाद केन्द्रीय कमिटीमा जान लागेको हो । केन्द्रीय कमिटी बैठक बोलाउन नेकपाका दुवै पक्ष राजी भएका छन् ।

नेकपा विधानमा ६ महिनामा केन्द्रीय कमिटी बोलाउने प्रावधान छ । पछिल्लो पटक गत माघमा केन्द्रीय कमिटी बैठक बसेको थियो । भदौ पहिलो साता केन्द्रीय समितिको बैठक बोलाउने तयारी रहेको ती स्थायी कमिटी सदस्यले जानकारी दिए ।