ओसामा बिन लादेनका विषयमा नेसनल जियोग्राफिकले बनाएको एक वृत्तचित्रमा अनौठो खुलासा गरिएको छ । 
 

नेभी सील टीमले लादेन लुकेको ठाउँमा पोर्न फिल्महरूको ठूलै संकलन फेला पारेको थियो । ‘बिन लादेन्स हार्ड ड्राइभ’ नामक वृत्तचित्रका अनुसार, लादेनले पोर्न फिल्म हेर्ने मात्र नभई त्यसको भिडियोमा गोप्य सन्देश राखेर बाहिर पठाउने अनि थप पोर्न भिडियो मगाउने गरेका थिए । 

लादेनका विभिन्न चिट्ठीपत्र हेर्दा उनले इमेलप्रति अविश्वास गर्ने र आफूभन्दा तलकालाई दिएका आदेश बीचैमा चुहिने डर उनमा रहेको देखिन्छ । उनले सहयोगीहरूलाई कुरियरमार्फत सन्देश पठाउँथे तर कागजमा नभई पोर्न फिल्मको भिडियोमा राखेर पठाउँथे, वृत्तचित्रमा दाबी गरिएको छ । 

इस्लामको कट्टरपन्थी व्याख्या गर्ने अल कायदा संगठनले अश्लील सामग्री हेर्नु हराम हो भने पनि लादेनले पोर्न फिल्मको विशाल संकलन गरेको उनलाई मार्न जाने नेभी सीलहरूले देखेका थिए । 

तर लादेनसँगै कम्तीमा २२ जना अन्य मानिस बस्ने गरेको र उनीहरूमध्ये जोकोहीले पोर्न संकलन गरेको हुन सक्ने डकुमेन्टरीमा उल्लेख गरिएको छ । यो संकलनलाई अमेरिकी अधिकारीहरूले सार्वजनिक गर्न मानेका छैनन् । कस्ता किसिमका पोर्न फिल्महरू लादेनले संकलन गरेका थिए भन्ने विषयमा कुनै संकेत पाइएको छैन ।