पछिल्लो समय निरन्तर सुधारको क्रममा रहेका वाणिज्य बैंकहरूले १ हप्ताको अवधिमै ६९ अर्ब रुपैयाँले कर्जा प्रवाह र निक्षेप संकलन ७१ अर्बले बढाएका छन् । यसले अर्थतन्त्र क्रमशः लयमा फर्किन थालेको संकेत गरेको छ ।

कोरोना संक्रमणबाट जोगिँदै सर्वसाधारण दैनिक कामकाजमा फर्कन थाल्नु र चाडबाडको माहोलले गर्दा बैंक तथा वित्तीय संस्थाको कर्जा प्रवाह र निक्षेप संकलनमा ह्वात्तै सुधार आएको हो । ६ महिनाअघिको बन्दाबन्दीपछि कर्जा प्रवाह ठप्प बनेका बैंकहरू पछिल्ला दिनमा कर्जा प्रवाह र निक्षेप संकलनमा आएको वृद्धिले उत्साहित बन्दै छन् ।

बैंकहरूले असोजको २३ गतेसम्म २८ खर्ब ७२ अर्ब रुपैयाँ ऋण प्रवाह गरेकामा ३० गते आइपुग्दा यो बढेर २९ खर्ब ४१ अर्ब रुपैयाँमा पुगेको हो । यसैगरी असोज २३ सम्म २९ खर्ब ६४ अर्ब निक्षेप संकलन गरेका २७ वाणिज्य बैंकले असोज ३० गतेसम्म ३० खर्ब ३५ अर्ब रुपैयाँ निक्षेप संकलन गरेका छन् । १ हप्तामै निक्षेप संकलन मात्र ७१ अर्बले बढेको हो ।

बैंक तथा वित्तीय संस्थाको कर्जा तान्ने होडबाजी, कर्जा तान्ने विभिन्न दशैं योजना र अफरले आर्थिक क्रियाकलाप चलायमान हुन थालेको छ । दशैंले बजारमा बढाएको चहलपहलसँगै बैंक तथा वित्तीय संस्थाको कर्जा प्रवाह बढ्न थालेको हो ।

नेपाल बैंकर्स संघका कार्यकारी निर्देशक अनिल शर्मा बजार खुलेपछि चाडबाडले गर्दा कर्जा र निक्षेपको मागमा उल्लेख्य सुधार आएको बताउँछन् । कर्जाको ब्याज दर घट्नु, आर्थिक क्रियाकलाप खुल्दै जानु, दशैंको माहोल बन्दै जानुले बैंक तथा वित्तीय संस्थामा कर्जाको माग आउन थालेको उनको भनाइ छ ।

भदौको अन्त्यदेखि असोज ९ गतेसम्म करीब २ हप्तामा वाणिज्य बैंकहरूको कर्जा लगानी २५ अर्ब रुपैयाँले बढेको थियो । बैंक तथा वित्तीय संस्थाले मुद्दती निक्षेपमा पनि ब्याज बढाएका कारण निक्षेप संकलन पनि २ हप्तामा करीब ३७ अर्ब रुपैयाँले बढेको थियो ।

असोज ९ गतेसम्ममा वाणिज्य बैंकले ३५ खर्ब ३२ अर्ब रुपैयाँ निक्षेप संकलन गरेका छन् भने २९ खर्ब २९ अर्ब रुपैयाँ कर्जा लगानी गरेका थिए । गोरखापत्र दैनिकमा खबर छ ।