प्रधानमन्त्री केपी शर्मा ओलीले प्रदेश १ का आफूनिकट नेताहरूलाई जनताको बहुदलीय जनवाद(जबज)मा एकढिक्का रहन निर्देशन दिएका छन् ।

बुधवार अपराह्न आकस्मिक रूपमा आयोजना गरिएको जुम मिटिङमा ओलीले आफूनिकट प्रदेश कमिटीका सदस्यहरूलाई जबजमै अडिग रहन निर्देशन दिएका हुन् ।

जुम मिटिङमा प्रधानमन्त्रीसँगै उपप्रधानमन्त्री ईश्वर पोखरेल र प्रदेश १ का १७ जना भन्दा भन्दा बढी नेताहरूको सहभागिता थियो ।

दुवै नेताहरूले जबजलाई पूर्व माओवादी समूहले पनि आत्मसात गर्न सक्ने बताउँदै ब्रिफिङ गरेका थिए ।

'सहमतिका साथ जानुपर्नेमा पूर्वसमूहहरू बनाएर दबाब दिने काम बढेको छ,' ओलीको भनाइ उदृत गर्दै स्रोतले लोकान्तरसँग भन्यो, 'अन्यत्रै समीकरण बनाएर राजीनामा माग्ने काम भएको छ । जुन गलत छ । यसको विरुद्धमा कमरेडहरू डटेर लाग्नुपर्छ ।'

मिटिङमा ओलीले आफूहरूले पार्टीलाई एकढिक्का राख्न अन्तिमसम्म पहल गर्ने तर अर्को पक्ष सहमतिमा नआए अप्रिय निर्णय पनि लिनुपर्ने भन्दै ब्रिफिङ गरेका थिए ।

उनले आफ्नो अन्तिम अश्त्र जबज नै रहेको बताए ।

मिटिङमा ओलीले मदनभण्डारी फाउण्डेशनलाई अझ सक्रिय बनाउनुपर्ने धारणा राखेका थिए । 'मदन भण्डारीको सिद्धान्त जोगाउने र फैल्याउने हाम्रो कर्तव्य बन्न आएको छ,' ओलीले भने, 'तपाईंहरू आफ्नो हिसाबले सक्रिय बन्नुहोस् ।'

मिटिङमा उपप्रधानमन्त्री पोखरेलले पार्टी महाधिवेशनसम्म पनि एक नरहन सक्ने ब्रिफिङ गरे । 'केन्द्रबाट एकताको डोरी चुडाउने हिसाबले समीकरण बन्ने र त्यो प्रदेश र स्थानीय तहसम्म पुग्ने स्थिति हुने हो भने पार्टी महाधिवेशनसम्म पनि एक नरहन सक्छ,' पोखरेलको भनाइ उदृत गर्दै बैठकमा सहभागी एक नेताले लोकान्तरलाई बताए ।

पार्टी एकताको बेलामा बलियो पार्टी बनाएर जनताका काम गर्ने योजना प्रधानमन्त्री ओलीको भएपनि कामै गर्न नदिने परिस्थिति सिर्जना गरिएको भन्दै पोख्रेल आक्रोशित मुद्रामा देखिएका थिए ।

'हामी राजनीतिक र सांगठानिक शक्तिबाट विमुख बनेका छौं,' पोखरेलको भनाइ थियो, 'हेर्दा ठूलो छ पार्टी । जताततै छ । प्रदेशमा छ, केन्द्रमा छ, स्थानीय निकायमा छ । तर भित्री रूपमा हामी कमजोर भएका छौं । अहिले पार्टी वास्तविक रूपमा कहीं पनि नभएको महशुस हुँदैछ ।'

उनले कुण्ठाग्रस्त मानसिकता बोकेकाहरू नै पार्टीको नेतृत्व तहमा भएकाले समस्या आएको ब्रिफिङ गरे ।

'एकता भएपछि आफ्नो स्वार्थ पूरा गर्न पाइन्छ भनेर कतिपय नेताहरू एकताप्रक्रियामा लागेका थिए,' पोखरेलले भने, 'अहिले आफ्नो स्वार्थ पूरा गर्न नपाएपछि यत्रो जनमत प्राप्त सरकारलाई कुनै काम गर्न दिएका छैनन् । यही सत्य हो ।'

मदन भण्डारी फाउन्डेसनको नाम लिँदै पोखरेलले विचारमा च्यूत हुन नहुने ब्रिफिङ गरे । 'कहिलेकाहीँ गिभ एण्ड टेक हुन सक्छ तर विचारका आधारमा च्यूत हुनुहुँदैन । एकता भयो भन्दैमा आफ्ना मान्यताबाट स्खलित हुने कुरा हामीबाट हुनुहुँदैन ।'

बोल्ने क्रममा अधिकांश प्रदेश कमिटीका सदस्यहरूले अध्यक्षद्वयबीच सहमति नभएसम्म बैठक नबोलाउन सल्लाह दिएका थिए ।

'सहमतिबिना बैठकमा बस्ने कुरा हुँदैन,' जुम मिटिङमा सहभागी एक नेताले लोकान्तरसँग भने, 'प्रधानमन्त्री र उपप्रधानमन्त्री दुवैको धारणा बैठकलाई विग्रहको थलो बनाउन नहुने भन्ने छ । त्यसैले शीर्ष तहमा समन्वय नभई बैठक नबोलाउने सल्लाह हामीले नेतृत्वलाई दिएका छौं ।'