एकीकृत भन्सार जाँच चौकी विराटनगरले चालू आर्थिक वर्ष २०७७/७८ को ३ महिनाको अवधिमा कूल ७ अर्ब ९३ करोड ३० लाख ४२ हजार रुपैयाँ राजस्व संकलन गरेको छ ।

यस अवधिमा कार्यालयले १० अर्ब १ करोड १८ लाख ६ हजार राजस्व संकलन गर्ने लक्ष्य लिएको थियो । 

संकलित राजस्व लक्ष्यमा ७९ दशमलव २४ प्रतिशत मात्र प्रगति हासिल गरेको छ । गएको वर्षमा यो अवधिमा कूल ८ अर्ब ९९ करोड ३८ लाख ९ हजार राजस्व संकलन गरेको थियो । राजस्व संकलनको हिसाबले हेर्दा गत वर्षभन्दा यस वर्ष सो अवधिमा १ अर्ब ६ करोड ७ लाख ५८ हजारले कम हो भने चालू आर्थिक वर्षमा लक्ष्यको भन्दा २ अर्ब ७ करोड ८७ लाख ६४ हजारले कम हो ।

भन्सार कार्यालयबाट प्राप्त जानकारीअनुसार संकलित राजस्वमा भन्सार महसुल आयाततर्फ ३ अर्ब १७ करोड २ लाख ९२ हजार, मूल्यअभिवृद्धि कर ३ अर्ब ८२ करोड ७८ लाख ३८ हजार, अन्तःशुल्क ४६ करोड ३७ लाख ८२ हजार, भन्सार महसुल निर्याततर्फ ३९ लाख ५३ हजार, कृषि सुधार शुल्क २७ करोड ६३ लाख, भन्सारको अन्य आय ९४ लाख ३६ हजार र पूर्वाधार कर १८ करोड १४ लाख ४० हजार छन् ।

कार्यालयले चालू आर्थिक वर्षको ३ महिनाको शुरूको महिनामा सय दशमलव १२ प्रतिशत प्रगति हासिल गरेको छ भने भदौमा ७७ दशमलव ८९ प्रतिशत र असोज महिनामा ७० दशमलव २५ प्रतिशत मात्र प्रगति हासिल भएको जनाएको छ ।