नपाली कांग्रेसका केन्द्रीय सदस्य गगन थापाले प्रतिनिधि सभा पुनःस्थापना नै राजनीतिक निकासको प्रस्थानबिन्दु हुने भन्दै पुनःस्थापित संसद्ले असंवैधानिक कदम चाल्ने राष्ट्रपति र प्रधानमन्त्रीलाई घर फर्काउने दाबी गरेका छन् ।

उनले अहिलेको अवस्था सिर्जना हुनुमा प्रधानमन्त्री केपी शर्मा ओलीमात्र नभएर पुष्पकमल दाहाल ‘प्रचण्ड’ र माधव नेपाल पनि दोषी रहेको आरोप लगाए ।

तरुण दलले शुक्रवार भक्तपुरमा आयोजना गरेको कार्यक्रमलाई सम्बोधन गर्दै नेता थापाले देश ढिलोचाँडो चुनावमा जाने पक्का भएपनि प्रस्थानबिन्दु प्रतिनिधि सभा पुनःस्थापना नै भएको बताए । 

‘कांग्रेसले अदालतको निर्णय पर्खेको छैन, प्रधानमन्त्रीले गर्नुभएको संसद् विघटनको निर्णय घोर असंवैधानिक र प्रतिगामी हो । कांग्रेसले बोल्ने यही हो, देउवाले बोल्ने र रामचन्द्र पौडेलले बोल्ने पनि यही हो । सिंगो देशले सर्वोच्च अदालततर्फ हेरिरहेको समयमा श्रीमानहरूले दायाँबायाँ हेर्नु पर्दैन, संविधान पल्टाएर हेरे हुन्छ । मलाइ पूर्ण विश्वास छ, अदालतले प्रतिनिधि सभा पुनःस्थापना गर्छ,’ थापाले भने, ‘प्रतिनिधि सभा पुनःस्थापनापछि संसद्ले राष्ट्रपतिलाई घर पठाउँछ, प्रधानमन्त्रीलाई बालकोट ल्याउने बाटो खोल्दिन्छ ।’ 

नेता थापाले देश ढिलो चाँडो निर्वाचनमा जाने भएपनि वैशाखमा चुनाव नहुने बताए । ‘ढिलो चाँडो देश जाने निर्वाचनमै हो, जान्छ । निर्वाचनमा जाने बाटो संसद् भएर जाने हो । संविधान अनुसारको चुनाव हो । निर्वाचनको तयारीमा हामी जाने हो,’ उनले भने । 

प्रचण्डहरू आफ्नै कारणले हामी यहाँ छौं भनेर सडकमा बस्नुपर्ने स्थिति आएको थापाको टिप्पणी थियो ।

‘हिजो मैले संसद्मा राष्ट्रपति महारानी होइबक्सन लाग्यो भन्दा कहाँ हुनुहुन्थ्यो तपाईंहरू ? एकजना प्लेन चलाउने पाइलट हुनुहुन्थ्यो । अर्को झ्यालबाट छिरेर राष्ट्रिय सभामा जाँदै हुनुहुन्थ्यो । तपाईंहरूको लालचाले गर्दा राष्ट्रपति र प्रधानमन्त्रीको गिरोहले असंवैधानिक काम गर्‍यो । अहिले सडकमा आएर रुञ्चे जस्तो हामी यहाँ छौं भन्ने ! यो अवस्थाको जिम्मेवार प्रचण्ड–नेपाल पनि हो,’ थापाले भने । 

प्रचण्डलाई चितवनमा चुनाव हार्छु भन्ने डर र ओलीलाई सिंहदरबार छिर्न पाउँदिन भन्ने डरले नेकपा जोडिएको उनले टिप्पणी गरे ।