शुक्रवार भारतीय सीमामा प्रवेश गरेका एक चिनियाँ सैनिकलाई भारतीय सेनाले पक्राउ गरेको छ । उक्त सैनिकलाई तत्कालै फिर्ता गर्न चीनले माग गरेको छ । 

पूर्वी लद्दाखको वास्तविक नियन्त्रण रेखा पार गरेर भारतीय सीमामा उक्त चिनियाँ सैनिक आइपुगेका थिए । उनलाई पांगोङ तालको दक्षिणी तटमा भारतीय सेनाले पक्राउ गरेको हो । 

भारत र चीन दुवैले वास्तविक नियन्त्रण रेखामा ठूलो संख्यामा सैनिक तैनाथ गरेका छन् । गत मे महिनादेखि त्यस क्षेत्रमा दुई देशबीचको तनाव जारी छ । 

आफ्नो एक सैनिक भूलवश सीमाक्षेत्रमा हराएको र भारतमा पुगेको चिनियाँ सेनाले पुष्टि गरेको छ । आफ्नो अन्लाइन साइटमा चिनियाँ सेनाले लेख्यो, ‘राति अँध्यारो हुँदा र जटिल भौगोलिक स्थितिका कारण चिनियाँ जनमुक्ति सेनाको

फ्रन्टियर डिफेन्स फोर्सका एक जवान शुक्रवार बिहान सीमाक्षेत्रबाट हराएका छन् । यस विषयमा भारतीय सेनालाई खबर गरिसकिएको छ ।’

‘भारतीय पक्षले उक्त सैनिक आफ्नो नियन्त्रणमा रहेको जानकारी दिएको छ । उसले समय बर्बाद नगरी चिनियाँ सैनिक चीनलाई फिर्ता दिनुपर्छ । त्यसो गरे मात्र दुई देशबीचको सीमा तनाव घट्छ र शान्ति कायम हुन्छ ।’

गत अक्टोबर महिनामा पनि लद्दाखको डेमचोक सेक्टरमा वास्तविक नियन्त्रण रेखा पार गरेर भारत पुगेका एक चिनियाँ सैनिकलाई भारतीय सैनिकहरूले समातेका थिए । पछि प्रोटोकल अन्तर्गत रही भारतीय सेनाले उनलाई फिर्ता गरेका थिए ।