बिहे समारोहलाई भव्य बनाउन सामान्य तडकभडक त हुने गरेको छ । तर दुलहीको सपना पूरा गर्नकै लागि हेलिकप्टरमा बिहे लगेर ससुराली पुगेको घटना भारतको राजस्थानमा भएको छ ।

राजस्थानको भरतपुरमा दुलहीको सपना पूरा गर्न हेलिकप्टरमा बिहे लगेर दुलाहा ससुराली पुगेका छन् । हेलिकप्टरमा आएको बिहे हेर्न गाउँमा सर्वसाधारणको भीड लागेको भारतीय सञ्चारमाध्यमले जनाएका छन् ।

दुलही रमा र दुलाहा सियारामको गाउँ नजिकै भएपनि सपना पूरा गर्नका लागि हेलिकप्टर प्रयोग गरिएको छ । मंगलवार रमा र सियारामको बिहे धुमधामसँग भएको छ ।

दुलही रमाले आफू हेलिकप्टरमा चढेर ससुराली जाने सपना रहेको बताएपछि सियारामले त्यसको व्यवस्थापन गरेका थिए ।

सियाराम हुलाक विभागमा कार्यरत कर्मचारी हुन् । दुलहीको इच्छा पूरा गर्न हेलिकप्टर प्रयोग गर्दा थप ६ लाख रुपैयाँ खर्च भएको जनाइएको छ ।