नेपाली कांग्रेसका सभापति शेरबहादुर देउवाले महामन्त्री डा. शशांक कोइरालाले कोरोना संक्रमण बढेको भन्दै बैठक रोक्न आग्रह गरेपछि आफूले केन्द्रीय समितिको बैठक रोकेको बताएका छन् ।

सभापति शेरबहादुर देउवा तोकिएको समयमा पार्टीको महाधिवेशन गर्न इच्छुक नभएको भन्दै वरिष्ठ नेता रामचन्द्र पौडेल पक्षले आरोप लगाएको छ । 

‘शशांकले नै रोक्न भनेको हो । डाक्टर मान्छेले भनेको मैले नमान्ने ? डाक्टर भइसकेको मान्छे महामन्त्री छ, कोभिड भइसकेको मान्छे, उहाँको सल्लाह नलिने भन्ने हुन्छ ?’ बुधवार आफ्नै निवासमा आयोजित पत्रकार सम्मेलनमा सभापति देउवाले भने । 

यसअघि नेता पौडेलले सभापति देउवाले पार्टीको महाधिवेशन टार्न खोजेको आरोप लगाएका थिए । जवाफमा देउवाले आफू पार्टी सभापति भएदेखि नै पौडेलले आलोचना गरिरहेको आरोप लगाए । 

पत्रकार सम्मेलनमा सोधिएको एक प्रश्नमा देउवाले जसपाले निर्णय नगर्दा कांग्रेसको नेतृत्वमा वैकल्पिक सरकार गठनको प्रयास सफल हुन नसकेको बताए । 

‘मेरो पार्टीले कांग्रेसको नेतृत्वमा वैकल्पिक सरकार बनाउन प्रयास गर्ने भनेर निर्णय गरिसकेको छ । चाहेर मात्र हुन्छ र ? प्रधानमन्त्री बन्न संख्या पुगेन,’ देउवाले भने, ‘अविश्वासको प्रस्ताव केको लागि गर्ने ? फेल भएपछि फेरि गर्नै पाइन्न नि !’