इरानको रिभोल्युसनरी गार्ड्सले अमेरिकाको संसद् भवन क्यापिटोल ध्वस्त पारेको र जेरुसेलम स्वतन्त्र बनाएको भन्दै प्रचारबाजीका लागि नक्कली भिडियो सार्वजनिक गरेको छ । 

उक्त भिडियो इरानको सरकारी टीभीमा आइतवार प्रसारण गरिएको हो । देशका सर्वोच्च शासक अली खमेनीले राष्ट्रको नाममा सम्बोधन गर्नुअघि उक्त भिडियो देखाइएको थियो । 

भिडियोमा आईआरजीसीका सैनिकहरू फर्मेसनमा रही अगाडि बढिरहेको देखिन्छ । अर्को दृश्यमा अपरिचित स्थानबाट क्षेप्यास्त्र प्रहार गरिएको देखिन्छ । 

त्यसपछिको फ्रेममा क्यापिटोल ध्वस्त पारिएको देखाइन्छ । त्यसको केही क्षणपछि इरानका धर्मगुरुहरू जेरुसेलमतर्फ बढिरहेको देखिन्छ । त्यसक्रममा इरानको राष्ट्रवादी गती बजिरहेको सुनिन्छ । 

उक्त गीतमा क्यापिटोल दमनको दरबार भएको र त्यसलाई अलावी आईआरजीसीले ध्वस्त पारेको अनि जेरुसेलमलाई मुक्त पारेको सुसमाचार इरानबाट आउने गीतको बोल हो । 

अमेरिकाको रिपब्लिकन पार्टीका सिनेटर प्याट टूमीले उक्त भिडियोमा प्रतिक्रिया जनाउँदै ट्रम्प प्रशासनले इरानमाथि लगाएको प्रतिबन्ध हटाउने मागलाई बाइडन प्रशासनले पूरा गर्न नहुने बताएका छन् ।