नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’, नेकपा एमालेका (निलम्बित) वरिष्ठ नेता माधवकुमार नेपाल र जनता समाजवादी पार्टी (जसपा) का अध्यक्ष उपेन्द्र यादवबीच बुधवार छलफल भएको छ ।

आफ्नो निवासमा भएको भेटमा माधव नेपाल पक्षका सांसदले राजीनामा दिने कि नदिने भन्ने विषयमा छलफल भएको जसपा अध्यक्ष उपेन्द्र यादवले बताए ।

‘केपी ओली प्रतिगमनकारी हो, उनी संघीयता, गणतन्त्र सबैको विरोधमा लागेका छन्,’ जसपा अध्यक्ष यादवले भने, ‘हामी यो प्रतिगमनकारी सरकारको विकल्प खोज्न एकमत छौं ।’

जसपाभित्र बहुमतभन्दा पनि सर्वसम्मत तरिकाले नै उक्त निर्णय गराउने आफ्नो प्रयास रहेको यादवले बताए।

‘मैले आन्दोलन गरेर संघीयता ल्याएको हो, केही साथीहरू मेरो प्रस्ताव वा मेरो राजनीतिक लाइनबाट अलग देखिनुभएको छ,’ यादवले लोकान्तरसँग भने, ‘तर, पार्टीभित्र चाहे म एक्लै भए पनि त्यसका लागि लड्ने छु, ओली सरकारको विकल्प खोज्न तयार हुनुपर्छ।’

यद्यपि त्यस विषयमा हालसम्म पार्टीले निर्णय नगरेको उनले बताए। ‘हामी पार्टीका साथीहरूसँग कुरा गर्दैछौं, पार्टीले छिट्टै बैठक बसेर उक्त कुराको निर्णय गर्नेछ,’ उनले थपे, ‘पार्टीमा सर्वसम्मतले नै निर्णय होस् भन्ने मेरो चाहना छ ।’

विश्वासको मतको प्रक्रिया शुरू भएपछि वा अविश्वासको मत परेपछि त्यसबारे पार्टीले निर्णय गर्ने उनको भनाइ छ ।