प्रमुख प्रतिपक्षी दल नेपाली कांग्रेसले सरकारको काम कारवाहीका कारण अहिले प्रधानमन्त्री केपी शर्मा ओलीलाई विश्वासको मत दिन नसकिने बताएको छ ।

कांग्रेस सभापति शेरबहादुर देउवा निवास बूढानीलकण्ठमा बुधवार भएको २ दलका शीर्ष नेताको बैठकमा कांग्रेसले अहिले सरकारलाई समर्थन गर्न सकिने अवस्था नरहेको बताएको हो । 

‘प्रधानमन्त्री केपी शर्मा ओली सहितको टीम र हाम्रा सभापति शेरबहादुर देउवासहित कांग्रेसका नेताहरूको बैठक सौहार्दपूर्ण रूपमा बस्यो । मूलभूत रूपमा उहाँले विश्वासको मत लिइरहेको छु । कांग्रेसको सहयोगको अपेक्षा गर्नुभयो, हामी विपक्षी पार्टी हो, तपाईंलाई सहयोग गर्नसक्ने अवस्था छैन भन्ने कुरा राख्यौं,’ बैठकपछि कांग्रेस सहमहामन्त्री डा. प्रकाशशरण महतले भने । 

बैठकमा प्रधानमन्त्री ओलीले लोकतन्त्रको रक्षाका लागि विगतमा सहकार्य गरेको भन्दै फेरि सहकार्यका लागि प्रस्ताव गरेका महतले बताए । ‘हाम्रो उद्देश्य नै उहाँलाई असफल बनाउने भनेपछि सहयोग गर्छौं भन्ने कुरै भएन,’ महतले भने । 

कांग्रेससँगको छलफलमा प्रधानमन्त्री एवं एमाले अध्यक्ष ओलीसहित उपप्रधानमन्त्री एवं एमाले महासचिव ईश्वर पोखरेल, अर्थमन्त्री विष्णु पौडेल, गृहमन्त्री रामबहादुर थापा र एमाले संसदीय दलका उपनेता समेत रहेका संविधान सभाका पूर्व अध्यक्ष सुवास नेम्वाङ सहभागी थिए । 

कांग्रेसको तर्फबाट रामचन्द्र पौडेल, महामन्त्री डा. शशांक कोइराला, नेता कृष्ण सिटौला लगायत थिए । देउवालाई भेट्न ओली सहितका नेताहरू अपराह्न ४ बजे बूढानीलकण्ठ पुगेका थिए । उनीहरूबीच झण्डै २ घण्टा छलफल भएको थियो ।