कोरोनाको दोस्रो लहरले नेपाल र भारतमा हाहाकार मच्चाइरहेको छ । यसैबीच तेस्रो लहर पनि आउने भनी वैज्ञानिकहरूले चेतावनी दिएपछि सबैजना तर्सिएका छन् । 

तर तर्सिनुभन्दा पनि सतर्क रहनु र रोगसँग लड्नका लागि तयार भएर बस्नु अहिलेको आवश्यकता हो । दोस्रो लहर ल्याउनका लागि मानिसहरूको लापरवाही जिम्मेवार छ र तेस्रो लहरमा यस्तो लापरवाह हुन मिल्दैन । 

पोहोर सालको पहिलो लहरमा ५० वर्षभन्दा माथिका मानिस र वृद्धहरू बढी शिकार भएका थिए । अहिलेको दोस्रो लहरमा ३१ देखि ५० वर्षका मानिस संक्रमित भइरहेका छन् । अब तेस्रो लहरमा ६ देखि १२ वर्षका बच्चाहरू जोखिममा रहेको बताइएको छ । 

तेस्रो लहर कहिले आउँछ भन्ने कुनै निश्चित नभएकाले खोप लगाउने कामलाई तीव्रता दिनुपर्ने बताइएको छ । 

१८ वर्षभन्दा मुनिका बच्चाहरूका लागि खोप नबनेकाले उनीहरू नै तेस्रो लहरको बढी जोखिममा पर्ने देखिएको छ । त्यसैले पनि तेस्रो लहरको चिन्ता बढी देखिएको हो । 

खोपको अभावमा बालबालिका नै संक्रमणको वाहक बन्ने देखिन्छ किनकि बच्चाहरूमा हर्ड इम्युनिटी आउने भन्ने कुरा हुन्न । 

बालबालिकाको खोपको पिडियाट्रिक ट्रायललाई धेरै समय लाग्दैन । तर सरकारले यसका लागि अनुमति दिइहाल्नुपर्छ । ट्रायल सफल भएमा ९० दिनभित्र बालबालिकाका लागि खोप बजारमा आउन सक्छ ।